Ayera mainta na Corte Comun di Husticia a trata caso penal contra sospechoso Javier Esteban Maduro, kende Ministerio Publico ta sospecha a base di mensahenan di Whatsapp di a tene relacion sexual cu un mucha muhe cu tabatin 14 aña, den mei di 2019. E sospechoso ta nenga tur acusacion, y, interesantemente, e victima aparentemente tambe ta nenga di tin relacion cu Maduro.

Fiscal den su rekisitorio a pidi 3 aña pa e sospechoso Maduro, kende lo a tene relacion cu un mucha muhe di 14 aña di edad. Si e echo cu Maduro a tene relacion cu e menor no lo por wordo comproba, OM ta pidi castigo pa a influencia e menor por medio di Whatsapp pa tene relacion cu e mayor di edad, cual na mei 2019 tabatin un diferencia di edad di 34 aña entre su persona y e menor. Esaki mirando cu e tabatin 48 aña di edad.

Homber ta nenga acusacion.
Lo tabatin potretnan y videonan intimo di cada un suheto comparti entre nan via Whatsapp, cual hunto cu e mensahenan, ta duna OM rason pa pensa cu lo tabatin un relacion cu na cierto momento a bira sexual entre e homber y e mucha muhe. E fenomeno aki den lengua moderno ta miho conoci como ‘sexting’. Maduro ta nenga categoricamente di a tene relacion cu e menor. Hues a puntra varios biaha durante tratamento di e caso si ‘boso nunca a topa?’, ‘tampoco den auto?’. Riba tur esaki Maduro a contesta ‘no’. E ta para riba e punto cu e mensahenan ta simplemente mensahenan y cu nan nunca a yega di topa, pasobra e menor ta biba cu su wela y nunca e tabata mag di sali.

Fiscal sinembargo a puntra con ta posibel cu no tabatin contacto sexual entre su persona y e mucha muhe, si na cierto momento e mucha muhe a bisa ‘corda mi lenga riba bo penis’ den un mensahe. Maduro a bisa cu esaki tabata manera un fantasia, cu nunca a bira un echo. Maduro a cu esakinan tabata ‘djis palabranan’. Ademas di esaki, Maduro a defende su mes por medio di bisa cu e mucha muhe lo a bis’e cu e tabatin 17 aña di edad, y cu e lo bira 18 den un aña. Fiscal sinembargo a duda esaki, pasobra e declaracionnan cu Maduro a duna polis den pasado no ta cuadra cu loke el a presenta ayera den corte.

Cuestion di interpretacion di traduccion.
Defensa di Maduro, abogado Demis Illes, a enfoca su defensa riba e echo cu e palabra ‘corda’ den Papiamento tin mas nificado cu djis ‘herinneren’ den Hulandes, cual ta implica un evento den pasado cu lo mester corda. “Corda tambe por nifica imagine that, imagina bo”, e abogado a declara.

Ademas di esaki, fiscal di OM a enfoca riba e echo cu e sospechoso a bisa cu e lo huur un apartamento pa nan tene relacion, y cu na cierto momento e menor a bisa cu ‘awe nochi mi lo sinti bo penis den mi vagina’. Apart di esaki fiscal a enfoca riba e echo cu den e mensahenan e homber lo a bay na cierto momento na e menor su cas y a bati riba su bentana, mirando cu e mucha menor ta referi na e echo cu e no a tende cu el a toca riba e bentana. Maduro mientrastanto a indica cu e ‘nunca lo por a pasa e cura’ di e cas.

Maduro a bisa cu proximo biaha e lo bay percura pa puntra pa identificacion valido ora e acerca cualkier persona, den contexto di conoce e persona aki mas intimamente. Hues sinembargo a cuestiona e manera con parce Maduro no ta mira e aspecto inmoral di influencia un mucha muhe pa tene relacion of pa imagina tene relacion cu su persona, mirando e diferencia den nan edad.

Dos caso di envolvimento sexual cu menor den un dia.
E caso aki tabata e prome, di dos caso trata ayera, cu e tema di un persona mayor di edad sospecha di tene relacion sexual cu un menor. E di dos mester a wordo posponi pa via cu documentonan necesario pa trata e caso di A. C. Croes, lo a yega laat. Hues alabes a comenta cu e caso aki lo tabata ‘bastante pisa’ pa trata den un termino corto. Pa esaki e hues a pidi disculpa y a indica cu lo bay trata e caso riba 13 di maart pa 11 or y mey. Hues lo dicidi riba e caso di Maduro mes riba 21 di februari pa 8 or y 15.