Empleadonan di algun di e corantnan mas conoci di Merca ta puntra nan mes pakico nan sistema tabata e victima di un atake cibernetico stranhero.
Varios corant, incluyendo Los Angeles Times y The San Diego Union-Tribune, a sufri retrasonan den print y distribucion como resultado di e incidente. Algun reportero a hari e ironia di un virus digital afectando corant riba papel. Pero tambe tin preocupacionnan serio tocante e efectividad di e atake.
Tribune Publishing a bisa cu ‘malware’ a wordo detecta riba nan servers diabierna. E Union-Tribune, cu tambe a referi na un ‘virus’, a bisa cu mayoria di abonado a wordo laga sin un corant diasabra mainta como resultado.
E incidente a afecta otro corantnan di otro manera. Na e Baltimore Sun, por ehempel, e comics y e puzzle usual no a wordo inclui den e edicion di diasabra, e corant a Tweet. Na sur di California, distribucion di e New York Times y e Wall Street Journal tambe a mira retraso, pasobra tur corant ta depende di e mesun imprenta.
E LA Times, citando un ‘fuente cu conocemento di e situacion’ a bisa diasabra cu e atake cibernetico ‘ta mustra di a origina pafo di Merca’. Un vocero di Tribune Publishing a bisa cu e no por confirma esaki.
Y empleadonan na algun di e corantnan afecta a bisa cu nan no a ricibi hopi informacion for di gerencia tocante e alcance di e atake cibernetico. Un memo interno di CEO di Tribune, Justin Dearborn, a referi diasabra na ‘malware’ y a bisa ‘nos ta haciendo progreso cu e asunto aki’.
Corantnan cu ta haci uzo di software di Tribune a wordo afecta. E LA Times y e Union-Tribune no ta pertenece na Tribune mas, conoci anteriormente como Tronc. Pero e corantnan ainda ta uza algun di e sistemanan di Tribune.
E virus a ‘impedi nos habilidad di publica’, editor di Union-Tribune, Jeff Light, a bisa den un carta pa lectornan diasabra mainta. Segun e memo di Dearborn y e declaracion di su compania, e trahadonan mester a ‘busca un manera’ pa logra print e edicionnan di diasabra.
“No tin evidencia cu e informacion di credit card di nos clientenan, of otro informacion identificabel, a wordo afecta”, Dearborn a skirbi.
Pero algun sistema importante tambe a wordo interumpi. Ora algun lector di LA Times a yama pa puntra tocante nan edicion di papel, e lineanan telefonico di servicio di cliente no tabata activa.
Y empleadonan na dos corant uzando software di Tribune a bisa CNN Business cu e sistema di ‘time card’ pa tene cuenta di oranan di trabou tabata offline pa algun tempo.
E paginanan di internet di e corantnan afecta no a sinti impacto, sinembargo. E South Florida Sun Sentinel, den nan storia tocante e virus, a cuminsa bisando: “Nos t’ey ainda.”
