(AP)—Paisnan rond mundo a tuma turno pa rechasa un trato preliminar vago cu a ser publica ayera, cual tin e intencion pa forma e fundeshi di cualkier trato cu paisnan lo yega na dje durante e discusionnan climatico di e Organisacion di Nacionnan Uni (ONU) riba placa pa paisnan den desaroyo pa asina transiciona pa energia limpi y adapta na cambio di clima.
E trato preliminar a laga un punto critico afo: con hopi placa e nacionnan rico lo duna paisnan pober. Un opcion clave pa e suma mas abao cu donantenan ta dispuesto pa paga tabata marca solamente cu “X”. Esaki parcialmente pasobra nacionnan rico ainda mester haci un oferta den negociacionnan.
Negociante principal Yalchin Rafiyev a enfatisa con balansa e plan tabata, pero tur banda a keda bisa cu e no tabata balansa mes y a subraya cu tempo ta cabando. “Nos lo kier corigi e balansa. E ta completamente desbalansa,” segun delegado Romina Khurshid Alam a bisa. Hopi a expresa e mesun sentimento aki, yamando e trato “desbalansa” y “inaceptable.”
Den un declaracion e presidente di COP29 a subraya cu e tratonan preliminar “no tabata definitivo.”
“E presidente di COP29 semper ta habri pa conecta propuestanan hunto cu e partidonan kier presenta,” e presidencia a bisa. El a agrega cu posible sumanan pa un gol financiero lo ta den e proximo version cu lo ser publica awe.
Otro areanan cu ta den negociacion ta inclui e compromiso pa stop e emision di combustible fossiel y con pa adapta na cambio di clima. Pero nan a mira tiki movemento. Nacionnan Europeo y Merca a critica e pakete di propuestanan pa no ta suficiente fuerte den reitera e yamado di aña pasa pa un transicion for di combustible fossiel.
Enviado di clima pa Merca, John Podesta, a bisa cu e tabata sorprendi cu “no tin nada cu ta carga dilanti e…resultadonan cu nos a acorda na dje aña pasa na Dubai.” Merca, e emitor mas grandi di gasnan di efecto vernadero, a hunga tiki rol den e discusionnan mientras e ta enfrenta un otro presidencia bao Donald Trump.
Pero miembronan di e Beyond Oil and Gas Alliance manera Colombia, Irlanda y Dinamarca, ken ta pushando pa un fin di combustible fossiel, a bisa cu e falta di palabracion pa transiciona for di combustible fossiel no ta stroba e trato pa nan.
Algun dia prome, e 20 economianan mas grandi a reuni na Brasil y no a menciona e yamado pa transiciona for di combustible fossiel. Secretaria general di ONU, Antonio Guterres, ken tabata t’ey, a bisa cu lenguahe oficial ta un cos, pero realidad ta otro.
“No lo tin manera” pa mundo limita calentamento global pa 1.5 grado Celsius “si no tin un transiciona for di combustible fossiel,” Guterres a bisa durante un conferencia di prensa ayera.
