Recientemente Cruz Cora a tuma nota di algun declaracion di ciudadanonan den nos comunidad den medionan di comunicacion. Esta cu nan peticion pa ayudo humanitario den forma di cuminda a wordo nenga inhustamente. Bon Dia Aruba tambe a acerca e organisacion aki pa aclaria algun keho cu a drenta cerca nos.

Cruz Cora a tuma nota di esaki y a bay den accion inmediato pa investiga si e ciudadanonan aki mester a ricibi ayudo humanitario. Tur esakinan conforme reglanan di aplicacion, mirando cu un di e principionan fundamental di e organisacion ta pa duna sosten humanitario, sin distincion den rasa, nacionalidad y/of religion.

Nan kier trece claridad rond di ayudo humanitario cu nan ta maneha. Nan ta consisti di diferente departamento y cada un di nan tin nan criteria. Den e caso aki, e departamento cu ta bay over cu ayudo di cuminda y/of vouchers di supermercado, tin su criteria cu nan mester maneha riba dje. Uno esencial y fundamental ta cu basicamente e personanan cu a registra via nan website, nan ta wordo yama pa e departamento concerni, segun e ayudo cu nan mester, manera ta wordo splica mas abao.

Nan meta ta esun di por yuda esunnan di mas necesidad den nos comunidad. Nos comunidad ta uno cu tin presencia di cantidad di nacionalidad di diferente parti di mundo. No ta secreto cu e comunidad Latino ta esun mas grandi estableci na Aruba. Nan t’ey hunto cu pueblo di Aruba y otro nacionalidad tambe. Cruz Cora como organisacion internacional ta brinda ayudo humanitario sin distingui nacionalidad.

E coordinador di departamento di Asuntonan Social di Cruz Cora ta Arubiano cu e organisacion aki ta orguyoso di dje, ya cu e ta un universitario di nos Alma Mater. E ta esun cu ta maneha e departamento aki cu ayudo di varios boluntario, entre nan Latino. Pero tambe Arubiano, Hulandes, Curasoleño, etc.

Cruz Cora ta porta habri pa tur cu kier yuda boluntariamente. Esunnan cu ta haci e trabao aki for di luna maart, nan ta haci’e tur dia sin pago y cu amor. Nan mester motivacion pa sigui haci nan trabao boluntario cu dedicacion. Sin nan, dificilmente e organisacion aki por a yega na e meta te aworaki di 25 mil cuminda cayente reparti. Pa nan y pa Cruz Cora e logro aki ta uno grandi.

Sinembargo nan ta aclaria cu nan no ta haci niun distincion entre otro riba nacionalidad. Siempre y cuando e persona cu ta solicita pa ayudo cumpli cu e criteria. Nan no ta haci excepcion di unda el a bin y tampoco riba nan status legal. Pasobra e ayudo cu Cruz Cora ta duna ta uno humanitario.

Aplicacion

Cruz Cora a laga sa cu durante e temporada di COVID-19, nan a ricibi mas cu 12.000 peticion adicional pa ayudo cu cuminda y/of vouchers di supermercado. E ta procesa cada un di e peticionnan aki cumpliendo cu e criterianan stipula di un manera structura. Cruz Cora na su turno ta haci su mayor esfuerso pa por acomoda tur ciudadano den necesidad di ayudo lo mas pronto cu ta posibel. No obstante e impacto sin precedente cu COVID-19 a ocasiona.

Cruz Cora su boluntarionan ta trahando di dia y anochi pa haci mas diligente e procesonan existente y sigura cu tur persona cu ta cualifica pa ayudo humanitario, por ricibi esaki lo mas pronto posibel. E impacto di e demanda pa asistencia humanitario ta grandi y ta rekeri un proceso di registracion structura pa asina garantisa cu e ayudo ta yega cerca esnan cu tin mas mester di dje.

Situacion

Na momento cu Aruba a conoce su prome caso di COVID-19 na maart ultimo, Cruz Cora a activa su team di boluntarionan mesora cu e meta pa yega na suficiente recursonan pa duna e sosten necesario na esnan mas vulnerabel den nos comunidad cu a perde nan entrada y cu no tin cuminda pa come.

 

A reparti te cu awor 25.000 mil cuminda cayente y a otorga 8.500 voucher pa supermercado na varios famia den necesidad. Tur informacion financiero di e proyectonan di Cruz Cora ta wordo raporta den e cuentanan anual di Cruz Cora. Mescos tambe e proyecto specifico cu fondo di gobierno Hulandes pa cu e necesidad humanitario agudo cu COVID-19 a trece cune.

E proyecto aki ta wordo supervisa y evalua door di Hulanda pa sigura cu e ta cana debidamente na cada isla. Primordialmente cu fondonan destina na esnan den necesidad, berdaderamente ta yega su destino final.

Urgencia

Cruz Cora ta compronde e urgencia pa asistencia humanitario, muy en special ayudo di alimentacion, y a tuma nota di e esunnan cu a aplica cu a sinti cu no a wordo atendi segun expectativa.

Nan ta informa cu lastimamente tin varios caso di persona cu intencion menos noble cu ta purba di abusa di e ayudo humanitario di Cruz Cora y otro organisacionnan cu tambe ta brinda ayudo. Pa sigura cu tur ayudo ta bay na esnan mas vulnerabel, ta rekeri pa haci un proceso di registracion cu ta determina si un persona berdaderamente ta cualifica pa ayudo humanitario.

Dedicacion

Cruz Cora y su boluntarionan ta lanta tur dia, no obstante e situacion dificil cu nos comunidad ta pasando aden, cu un animo, dedicacion y amor incondicional pa sigui yuda esnan cu mas tin mester di dje. Homber y muhenan balente cu semper t’ey pa sostene abo den un di e momentonan mas dificil den e historia di nos pais! E organisacion aki ta convenci cu hunto nos lo sa di surpasa e crisis aki si nos tur extende nos man!