E iniciativa di fundacion Consumidor Arubano Solidario (CAS) pa di bin cu un cooperativa ta canando, pero e tin su proceso, asina Sr. Luciano Maduro di departamento di Asunto di Consumidor a declara na Bon Dia Aruba. Pero prome nan mester lanta un tipo di asociacion y e lantamento huridico di algo asina no ta facil.
Sr. Maduro a indica cu aparentemente ainda CAS ta trahando pa bin cu un cooperativa. Pero un asociacion den nos leynan di Aruba ta funciona bou un sistema di miembresia, caminda e miembronan ta contribui na e fondo pa asina e asociacion por sigui draai.
Directiva nobo
Actualmente CAS cu ta un fundacion supuestamente independiente ainda, ta depende di subsidio di gobierno riba gasto operacional y di personal. Sr. Maduro a bisa cu ta bon cu CAS por sigui haya e tipo di subsidio aki pa sigui realisa su trabou. Sinembargo otro tipo di organisacion pro derecho di consumidor den exterior ta traha independientemente, manera un asociacion cu ta sali na defensa di su miembronan cu ta e consumidornan. E echo cu nan ta “independiente e por tin mas forsa pa tin un efecto riba leynan y maneho”, segun Sr. Maduro. Sr. Maduro a bisa cu nan ta aplaudi e iniciativa di CAS di bin cu su propio asociacion pasobra esey lo ta den beneficio di e consumido. Ultimo cos cu e ta compronde ta cu fundacion CAS ta buscando miembronan pa nan hunta directiva. E ta un oportunidad pa e consumidor cu ta sinti cu e kier ta parti activo di e fundacion CAS por bira miembro di nan. Sr. Maduro ta sugeri pa esunnan interesa tuma contacto directamente cu e fundacion aki. Asina bo por contribui pa e movemento di proteccion di consumidor por bira mas grandi na Aruba, el a laga sa.
