Redaccion di Bon Dia Aruba a haya copia di e convenio entre Serlimar y Ecogas NV encuanto e forma y condicionnan di procesamento di desperdicio na Aruba. Segun e contract Ecogas a cuminsa dia 1 di juli 2018 cu procesamento di tur desperdicio na su facilidad na Barcadera pa un periodo di seis luna, cu cada biaha ta extende.

Ultimo dianan a surgi varios intercambio di expresion den prensa, tanto di banda di ministro encarga cu Infrastructura, Desaroyo Teritorial y Medio Ambiente, como di banda di Ecogas NV cu ta parti den e convenio aki.

E expresionnan contradictorio ta principalmente tocante e sumanan cu ambos partido mester paga otro pa servicio brinda. E sumanan menciona den e convenio ta e siguientenan:

  1. ‘Tipping fee’ di Afl.60,- cu Ecogas mester paga na Serlimar pa desperdicio cu mester bay Parkietenbos o cualker otro sitio cu Serlimar indica, cu no ta apto pa procesa y pone den ‘envirobales’.
  2. Ecogas mester paga Serlimar Afl. 60,- pa cada ton di material cu ta trece na Sero Teishi pa deposita ey (e asina yama ‘stortingsvergoeding’).
  3. Ecogas ta obliga pa cobra tur empresa (incluyendo Ecotech) cu ta recoge desperdicio di domicilio o comercial y ta entrega esaki cerca Ecogas, un ‘tipping fee’ di Afl. 180.
  4. Serlimar ta compromete pa paga Ecogas Afl. 180,- pa cada ton di desperdicio entrega na Ecogas pa procesa (e asina yama ‘verwerkingsvergoeding’).
  5. Ecogas ta dispuesto di tuma carton cu Serlimar por procesa y paketa na Parkietenbos pa e suma di Afl. 90,- pa ton. E suma debi pa e carton ta ser inclui den e ‘verrekening’ di e otro sumanan debi (stortingsvergoeding, verwerkingsvergoeding).

Cada luna Ecogas mester percura pa informa Serlimar encuanto e cantidad di material cu nan haya pa procesa. Di otro banda ta desconta e suma cu Ecogas debe Serlimar pa e material cu a bay Sero Teishi pa deposita.

Nota di redaccion: Despues di tur e turbulencia tocante ken ta paga ken cuanto, nos ta kere cu e resumen aki, cu a sali di e convenio entre e partidonan, ta duna suficiente informacion na publico. Ta aprecia e transparencia duna via e publicacion di e convenio aki.