E Conferencia di Partidonan di Convencion di Conseho di Europa riba Labamento, Buskeda, y Confiscamento di Producto di Crimen y riba Financiamento di Terorismo a publica revisionnan actualisa di monitoreo tematico evaluando, pa prome biaha, cumplimento di Aruba y Maroco cu varios provision di tratado.

Segun e Convencion a indica riba su website, e rapportnan ta evalua e implementacion di e provisionnan cu ta concerni e reversion di e deber di prueba den confisca producto, e maneho di e propiedad congela of confisca, monitoreo di operacionnan di banco como un modo di investigacion, e crimen di labamento di placa, responsabilidad corporativo, recidivismo internacional, posponemento di transaccion sospechoso, y comparti y debolbe propiedad confisca. Nan ta contene recomendacionnan pa ambos hurisdiccion pa mehora cumplimento cu e provisionnan di e Convencion.

E evaluacion di Aruba a keda ehecuta despues di un decision di Hulanda pa acepta aplica e tratado na e hurisdiccion aki.

E Convencion di Conseho di Europa riba Labamento, Buskeda, y Confiscamento di Productonan di Crimen y Financiamento di Terorismo (CETS. No. 198), conoci como e Convencion di Warsaw, habri pa firma na 2005, ta e prome tratado internacional cu ta cubri ambos e prevencion como e control di labamento di placa y financiamento di terorismo.

Convencion di Warsaw ta reforsa significantemente e standardnan internacional contra labamento di placa y contra financiamento di terorismo, incluyendo esnan di e Financial Action Task Force, FATF. E ta introduci e responsabilidad pa e ofensa di labamento di placa ora ta comete esaki mediante negligencia, ta cubri explicitamente e responsabilidad legal di e persona pa labamento di placa, recidivismo internacional y ta provee un variedad di medida specifico pa confisca producto. Tambe e ta duna autoridadnan nacional e poder pa stop transaccionnan sospechoso na e etapa mas trempan pa preveni nan movemento door di e sistema financiero. Ademas, Unidadnan specialisa di Inteligencia Financiero (FIUs) di estadonan miembro mester stop transaccionnan asina tur ora cu esaki keda solicit apa un partner FIU stranhero.

E Conferencia di e Partidonan ta monitor e cumplimento cu e convencion.