Na aña 2022, specificamente den luna di april, a bira conoci e noticia cu na ex-tereno di Nanki Country Club, entre area di Baby Beach y Rodgers Beach, ta bay cuminsa e construccion di asina e yama ‘Nanki at Baby Beach’, cual ta bay bira un condo-hotel boutique.

Segun informacion cu ex-presidente di San Nicolas Business Association, Andres Hernandez, a duna e tempo ey, “e inversionista nobo a firma pa un proyecto cu ta bay bira un hoya pa nos y esaki ta bay ta un hotel boutique bunita cu lo wordo traha den pro di naturalesa y cu un toke di Aruba su cultura y su tradicion cu lo trece un prosperidad grandisimo pariba di brug”, el a sigura.

Tambe, Alberto Perret cu ta representa The Perret Group, encarga cu e proyecto aki, a splica na april 2022 cu nan tabata buscando oportunidadnan di inversion na San Nicolas for di 2015.

Segun informacion di Nanki at Baby Beach riba su rednan social, esaki ta un proyecto cu ta bay conta cu 40 condo exclusivo di luho ubica na Rodgers Beach, “cual ta representa un oportunidad di inversion,” y ta bay ta un luga sostenible cu landscape, solar panel y water treatment di ultimo generacion integra den diseñonan elegante,” segun e anuncio di benta ta indica.

Pa loke ta trata prijs, un apartament condo di 90 meter cuadra di un camber y un baño, tin un costo di aproximadamente 431.000 dollar manera un compania di real state ta indica riba su website.

Sinembargo, un publicacion di periodista retira Hilario Donker, ken ta reporta tur loke tin di haci cu San Nicolas, dos dia pasa a publica riba su rednan social lo siguiente:

“Na Seroe Colorado den e area unda a cuminsa traha riba ehecucion di e proyecto ‘Nanki na Baby Beach’, dia 4 di october 2024 a pone posternan promocional riba e hekwerk cu ta rondona e area. E proposito di e posternan aki ta pa pone e atencion di potencial cumpradonan di condominio, cu tin cambernan na benta den e proyecto aki. Segun e inversionista di e proyecto aki, Alberto Perret, ya caba a bende 14/40 (35%) di e cambernan. Mas leu Alberto Perret a informa cu pa e proyecto aki a scoge pa e concepto Condo-Hotel. Un Condo-Hotel ta un hotel cu tur e amenidadnan y servicio di un hotel pero en bes di ta propiedad di un doño unico, ta propiedad den e caso aki pa 40 doño. Albert Perret a sigui bisa, cu ta dirigi riba hendenan cu gusta aire liber, disfruta di e cultura y e trankilidad di e area. Di otro banda e doñonan tin limitacion di uso, cu ta 180 dia pa aña. Esaki ta permiti pa tin inventario disponibel pa otro turistanan por bin disfruta di e area di Seroe Colorado y San Nicolas, den liña cu e vision di Gobierno di Aruba. Na e momentonan aki e area di ex area di Pais Nanki ta wordo limpia. Unabes cu esey ta cla lo tuma luga ground breaking, sigui pa e ehecucion di e construccion.”

Esaki a bira un noticia cu pa algun hende no a cay den bon tera. Por ehemplo, esnan den comunidad cu no ta di acuerdo cu e continuacion di construccion di hotel di Aruba, cu ta sigura cu esaki ta afectando hendenan local, specialmente medio ambiente, harmonia social y integridad cultural. Ademas cu mayoria di e condo aki, nan prijsnan ta excesivamente halto pa un persona local por yega adkiri un di nan.

Esaki ta algo cu hasta Aruba Birdlife Conservation a trece dilanti, caminda a entrega un carta na prome minister demisionario, Evelyn Wever-Croes (MEP), señalando cu “danki na varios estudio haci pa loke ta crecemento di turismo den e ultimo decadanan, ta mas cu claro pa bastante tempo caba cu e actual modelo di crecemento continuo y no controla den turismo, y e expansion relaciona cu esey di acomodacion y desaroyo di hotel no ta sostenibel, ni a corto, ni mediano ni a largo plaso. E resultado di e modelo (obsoleto) di crecemento pa turismo aki ta destrui e patrimonio hopi special – medio ambiente natural, harmonia social y integridad cultural – cu ta haci Aruba unico. Ademas ta reconoci caba cu e trayecto aki di crecemento turistico continuo ta conduci na un reduccion di e calidad di bida di e habitantenan di e isla y p’esey finalmente ta haci daño na e experiencia di e bishitante cu ta elemento central den nos industria turistico.”

E organisacion ambiental aki na comienso di aña a publica cifranan di industria turistico na Aruba, e capacidad y plannan, cu un poblacion di 108.000 persona y number total di 26.295 camber di hotel (registra y no registra) pa cada unidad di camber Aruba ta spera 4 habitante, si ta tuma e superficie di Aruba di 178 km2, esey ta nifica cu tin 148 unidad pa cada km2, nan ta interesa di haya sa “ki tipo di studio di capacidad di carga ta rekeri pa conclui cu te ainda tin mas luga pa hotelnan? y na base di kico?” esey tabata un di nan cuestionamento.

Ademas, Nigel Maduro ken ta un persona conoci caba pa comunidad pa su lucha pa medio ambiente, a señala cu “Alberto Perret ta gentrificando San Nicolas. Un cantidad di hende rico (no-local) ta bay bin San Nicolas y cumpra propiedad y condominio, djis pa huur na otro hende rico (tambe no-local).”

Kico kiermen gentrificacion? Un proceso mediante e cual districtonan popular ta wordo transforma profundamente pa yegada di habitantenan perteneciente na clase halto. Un termino cu a aparece pa prome biaha na 1963 door di un studio cu Ruth Glass, un sociologo a haci over e ciudad di Londres cu tabata considera como “abnormal.”

Di otro banda, desaroyadonan di ‘Nanki at Baby Beach’ a publica riba nan website con e hotel su diseño lo ta loke tambe a causa controversia pa algun ciudadano mirando e ubicacion y loke lo ser construi cu segun ta “ugly design.”

Algun potret ta cortesia di Hilario Donker su FB page y di rednan social.