Ayera a keda conoci cu e lider di partido Raiz, y awor minister di Integridad y vice-prome minister, Ursell Arends a bay exterior cu vakantie, segun loke e parlamentario y lider di partido MAS, Marisol Lopez-Tromp a trece dilanti riba su pagina di Facebook. E suceso aki a genera controversia y a hala hopi atencion den mundo di politica.

Riba su post, Lopez-Tromp a sigura cu Arends mester a informa parlamento di su ausencia “ y no por medio di vakantie pics por ehempel via Facebook”.

Pa cu esaki, parlamentario di partido Raiz, Raymond Kamperveen a comenta cu den e caso aki tin proceduranan na unda cu Arends lo a mester meld cerca instancianan, como por ehemplo Gobernador, caminda cu Kamperveen ta supone cu el a meld pa e biaha.

Sinembargo, Misha Raymond, ken ta lider di e fraccion di Raiz, a declara pa otro medio di comunicacion cu nan como fraccion no tabata na altura di e biahenan di e ministernan Arends y Wever.

Den mesun linea aki, a keda conoci cu Geoffrey Wever, minister di Asuntonan Economico, Comunicacion y Desaroyo Sostenibel tambe a biaha, segun loke el a publica riba su pagina Facebook na unda cu el a splica cu ora el a sali di biahe el a manda un carta pa presidente di parlamento, Edgard Vrolijk, informado cu e ta “uitlanding, pero e ta keda disponibel riba su telefon”.

E reaccion aki tambe tabatin relacion cu loke parlamentario Lopez-Tromp a trece dilanti cu “aparentemente minister di Economia tampoco ta na Aruba” y cu ta na su luga pa awor cu nan ta minister pa informa parlamento riba nan biahe.

“A tuma nota cu señora drs. Marisol Lopez Tromp a skirbi cu Minister di Asuntonan Economico, Comunicacion y Desaroyo Sostenibel a biaha sin informa Parlamento.

E informacion aki ta incorecto”, el a skirbi riba su pagina di Facebook. “Prome cu mi a sali di biahe mi a manda un carta pa Presidente di Parlamento informando cu mi lo ta uitlandig y cu mi ta disponible via email of telefon. Adhunto prueba di esaki.”

Segun Lopez-Tromp a indica tambe cu e procedura pa notifica biahe priva, vakantie of di trabao ta via un carta cu lo tin cu dirigi na Gobernador di Aruba, “por medio di e secretaris di Conseho di Minister cu e lo ta den exterior, sea pa trabao of pa biahe priva of vacacion y mencionando e pais caminda e lo ta. Alabes Minpres, Minister plenipotenciario, Buitenlandse Betrekkingen, MinBZ y Parlamento di Aruba mester a wordo notifica di Minister su ausencia”.