Controversia entre ministro Oduber y director HOH: Tocante efectividad y utilidad di vacuna (obligatorio)

Den fin di siman ministro encarga cu salubridad publico a reacciona fuerte riba su pagina di Facebook, riba ponencia di director Jacco Vroegop di Hospital Horacio Oduber, den entrevista cu e corant Amigoe di diahuebs 30 di december. Redaccion di Bon Dia Aruba a recuri na e articulo den e medio menciona pa haya tur e contexto den cual Vroegop lo a yega na conclusion fuerte encuanto efectividad di vacunanan disponible y su oposicion contra vacunacion obligatorio.

Loke a hala atencion di redaccion di e medio ta cu e promer 17 casonan di variante Omicron detecta na Aruba, a resulta persona cu tabata vacuna. “Esaki ta indica cu e vacuna contra Covid no ta detene contagio o propagacion,” e medio ta skirbi. Tambe ta bisa den e parti inicial di e articulo cu a acerca sr. Vroegop pa comentario, despues cu pregunta di nan pa informacion haci na tanto ministro presidente, ministro encarga cu salubridad publico y na DVG, a keda sin contesta. Un pregunta concreto na DVG tabata tambe tocante e cantidad di caso positivo (di Omicron) tabatin di persona vacuna; esaki desde inicio di e actual ola di contagio di cual segun DVG 67% ta contagio di e variante Omicron.

E parti den e entrevista cu Vroegop cu a hala atencion di e mandatario tabata (den traduccion di BDA): “Segun mi mientras tanto ta reconoci ampliamente cu e diferente vacunanan di Covid-19 ta proteha menos bon contra contagio cu loke tabata pensa anteriormente.” Y despues, loke no ta den e reaccion ministerial, a añadi: “Y contra Omicron (si mi mester bay tras di palabra di director di RIVM van Dissel), hasta ta traha 4 pa 5 biaha menos bon. E vacuna ‘booster’ ta parce di ta yuda solamente pa entre 25 pa 30 porciento. Ta pesey cu e no ta mas cu logico cu tur hende ta vulnerable atrobe pa e actual variante di Covid. Talvez esnan vacuna hasta mas, ya cu nan sistema di inmunidad ta parce di ta menos robusto cu di e hendenan cu a build up inmunidad di un manera natural. E ta apoya mi en todo caso como director di e unico hospital na Aruba pa keda contra un vacunacion obligatorio. Tur hende sa con critico mi tabata riba esaki desde inicio, y cu a pesar di hopi presion interno, mi no ta desea di haci distincion entre colaborador y pacient cu kier of no vacuna, o cu ta vacuna.”

Vroegop a cuestiona anto principalmente e sentido pa kier yega na vacunacion completo di e poblacion, y ta pesey e ta contra un obligacion general di vacunacion y ta kere mas den promocion di un estilo di bida saludable.

Informacion eroneo di tur banda

E asunto aki, banda di e controversia entre ministro y director HOH, ta mustra con informacion incompleto y eroneo ta haci cu ta dificil pa lector di cualkier medio comprende e situacion real. Pa cuminza, e medio mes ta pretende cu e vacunanan actual “no ta detene contagio o propagacion“. E pensamento eroneo aki ta cu un vacuna ta preveni transmision di un virus, loke no ta berdad. Un vacuna ta yuda pa mehora e probabilidad cu e persona, si e bin den contacto cu e virus, e no ta haya sintoma o sintoma leve so, cu no ta un problema medico. Pero esey no tin nada di haci cu e posibilidad di transmiti e virus, como persona vacuna, pa tercer persona, sin cu bo mes ta ripara cu bo a transmiti e virus. E siguiente conclusion di e medio cu, independiente di bo status di vacuna, bo mester bay den cuarentena si bo tabata den contacto cu un persona contagia, si ta completamente corecto. Cuestionable ta si cu ta menciona cu e promer 17 casonan di e variante Omicron na Aruba tur tabata pacient cu tabata vacuna. Cualkier conocedor di estadistica lo puntra: “Y e siguiente 17?” Esey pasobra den estadistica, mas chikito e ‘sample’ ta, mas grandi e desviacion for di e realidad total por ta. 17 caso no ta base pa conclusion valido pa henter un poblacion di diezmiles.

Director Vroegop tin razon ora e ta insisti cu den e fase aki, di un variante nobo, e vacunanan anterior – pa otro variante – ta duna menos proteccion. Esey no ta un misterio, sino un realidad grandi di cual mundo ta na altura pa casi un siglo caba. No ta pornada cu pa e otro coronavirus (Influenza) practicamente cada aña ta sali variante nobo di vacuna cu ta adapta na e variantenan nobo. Pues aki e director no a bisa nada nobo. Interogante ta lanta si ora e ta bisa cu esnan vacuna mester cuida mas ainda cu otronan, pasobra nan sistema inmunologico ta parce menos robusto cu di hende cu a haya nan inmunidad di manera natural. No ta sigur si esey ta sustenta pa dato confiable di otro pais pero ta laga sin discuti e grupo bastante grandi cu no a vacuna y cu no a haya inmunidad via contagio, cu ta vulnerable sin mas y cu te recientemente tabata forma e grupo mayoritario cu a haya Covid di gravedad, cu mester a hospitaliza.

E director mes ta bisa cu e vacuna di ‘booster’ ta añadi solamente 25 pa 30 porciento di proteccion. Ora bo ta pertenece na e gruponan di riesgo halto, e proteccion extra ey por haci e diferencia entre bira gravemente afecta o sobrevivi e contagio cu daño minimo. Pues esey no ta bisa cu e ‘booster’ no tin ningun sentido. Cu e ta keda personalmente contra haci distincion den hospital entre personal o paciente cu ta vacuna of no, esey no ta asunto cu e director ta dicidi riba su mes. Laga esnan autoriza haci nan trabao. Un cos si: no tin vacuna specifico pa Omicron y esey ta haci un vacunacion general y obligatorio dificil pa implementa.

Comentario di ministro Oduber

Ta remarcable cu den e articulo ta papia di cifra reciente, di e promer casonan di Omicron, y no ta Vroegop ta bisa esey sino e corant, mientras e mandatario ta maneha cifra general desde juli 2021. Di e manera aki ta comparando ‘appel cu peer’. E cifranan general di ultimo mitar di aña ta indica un sobrerepresentacion grandi di hende no vacuna, manera e ministro ta argumenta. Di otro banda no por saca conclusion pa e situacion actual, unda e variante Omicron a ‘take over’. Ta e datonan aki e medio tabata kier haya, cu nan razon, y cu no a haya contesta, ni di e promer mandatario, ni di e ministro encarga, ni di DVG. A base di e miles di contagio ultimamente por saca conclusion estadisticamente representativo pa e periodo di Omicron, y ta na gobierno pa divulga nan.

Di tur manera, director di HOH a haci bon di divulga su opinion encuanto vacunacion obligatorio, un tema controversial, no solamente pa hende cu di principio ta contra vacuna, sino pa e falta di un vacuna specificamente contra Omicron .