– Algemene Rekenkamer Aruba (Controlaria General) tin su rapport cla unda a evalua y analisa e cuenta anual di 2015 cu ta indica kico gobierno a ehecuta y gasta realmente.
Hopi atencion semper ta bay na e presupuestonan di gobierno, pero kico gobierno en realidad a logra di su plannen y kico e gastonan tabata, ta mas importante ma mira si un gobierno ta mantene su mes na su promesanan.
Pa basta aña e Controlaria General ta urgi gobierno pa drecha su financia y tambe cambia cierto leynan importante manera esun di Comptabilidad pa asina mantene e gastonan riba un nivel sostenibel. Sinembargo gobierno ta mustra cu no tin pura cu e cambionan necesario aki. Como resultado cu aña pasa e gastonan publico atrobe no a keda den e ramo cu gobierno mes a palabra tumando tambe e consehonan di CAFT no mucho na serio.
Asina e debe nacional atrobe a crece te na 3,9 biyon florin cual ta 82.4% GDP. E organo a calcula cu riba cabes di cada ciudadano ta colga un debe di 36.183 florin.
Gastonan di mas grandi na 2015 ta locual gobierno a gasta na personal y primanan. Di tur gasto, e puesto aki ta tuma 34%, sigui pa gastonan di interes cu 14.7%. 200 miyon di placa publica a bay na pago di interes riba debenan, cual ta hopi mas cu ta bay na salud publico y husticia, asina e Controlaria General a pone den su rapport.
Nan a compara e sumanan y por mira cu gobierno a gasta 150 miyon florin pa salud publico y cuido di anciano y 121 miyon pa polis y prizon. “Mas halto e gastonan di interes ta, menos placa tin pa gobierno por gasta pa bienestar di pueblo”, asina e organo ta conclui.
Pa cu e gastonan personal e rapport tambe ta mustra cu gabinete Eman na 2015 tabatin 328 empleado riba contract cu ta traha directo bou e ministernan y di cual 230 trahado no a pasa via e Departamento di Recurso Humano. Un gasto calcula riba 31.3 miyon florin.
Finalmente Controlaria General ta haci un apelacion atrobe na parlamento pa haci uzo di e instrumentonan cu nan tin pa controla e gobierno y asina preveni cu e gastonan di gobierno ta keda subi. Un di e instrumentonan ta cu parlamento por desaproba e presupuesto sea presupuestonan complementario. E aña atrobe gobierno tin un presupuesto complementario cu resultado cu mester drecha e presupuesto pa motibo cu a surpasa e gastonan pa cierto puestonan. Asina ta fix e presupuesto despues y casi tur biaha (no solamente cu e gobierno aki, pero esunnan anterior tambe) parlamento ta aproba esaki y duna e gobierno asina sosten pa sigui gasta mas.
