ORANJESTAD – Reaccion rapido di controladonan aereo na Aruba a evita desastre na aeropuerto. Den un comunicado emiti pa e asociacion cu ta representa e grupo di trahadonan aki, esta ACTAA controladonan aereo ta mustra cu nan no ta contento cu medidanan nobo introduci recientemente, y cu esaki ta causando problema. 1 di september ANSA NV a start un procedura nobo pa cu trafico aereo. Awor ta prohibi controladonan aereo di uza dos lenguahe pa comunica cu e pilotonan y awor ta solamente Ingles ma di wordo uza.
Ta trata di avion comercial Americano American Airlines ya den su careda di despegue y un avion priva cu piloto Venezolano cu no ta domina Ingles bon. E piloto Venezolano ta wordo instrui pa “hold short” cu kiermen keda pafo di pista mirando cu e avion comercial ta den take-off y simplemente no a compronde e instruccion “hold short” cu a wordo bisa varios biaha. Ora e controlado a ripara cu e avion priva ta subiendo pista dilanti esun den take-off a core bis’e pa para y e biaha aki na Spaño pa e piloto por compronde. Pa e ora aki ya e avion priva a crusa e liña di e pista y si no a par’e na tempo e lo a subi pista dilanti e avion comercial cu por tabata cu consecuencianan grave.
