Falta dos dia pa yega na fecha di eleccion y ainda nos por haya un par di sorpresa relaciona cu eleccion. Un di nan ta e caso pendiente di e partido grandi den oposicion pa logra un decision di corte den Promer Instancia cu ta contradeci e decision di gobierno pa no duna e partidonan politico ningun informacion di e votadornan. E decision ey talvez no lo cambia tanto den e decision di mayoria di votador, cu na e altura aki ya sa pa ken nan ta bay vota. Pero pa loke ta e resultado di e veredicto mes, nos lo no keda straña si huez den e caso aki bin cu un veredicto cu ta laga espacio pa un suministro di dato di votador den un forma limita. Si esey sucede, casi sigur esaki lo ta hiba gobierno back na e decision tuma na promer momento, cu tabata encera duna nomber y fecha di nacimento, pero no e adresnan. Ta parce improbable cu huez ta bay permiti e partido politico acceso na tur informacion, pasobra di bon fuente nos a comprende cu den e tratamento e partido cu a entabla e litigio, lo a bay di acuerdo cu e suministro di dato sin adres. Pero, ta mihor no specula den esaki, nos ta cerca di e veredicto caba.

Mas importante ta parce nos kico ta bay sucede despues. Di tur manera lo mester regla e asunto aki mihor, y no ta recomendable pa mester warda te cu falta tres luna pa e siguiente eleccion, pa cuminza haci algo. Y no bisa awor cu nos ta demasiado negativo, pasobra nos a mira e forma di actua aki ‘time and again’, esey tambe den e caso di e propio ley electoral aki, unda a sinta warda te ultimo, pa colmo adelantando eleccion cu varios luna y ya, ata nos den e mesun problema atrobe. Ta sigur cu desde mañan nos lo tende tur sorto di promesa y bon intencion tocante e asunto aki, pero for di nos practica politico nos por sa cuanto e tipo di promesa ey ta representa.

Y papiando di legislacion, ta realmente decepcionante cuanto no a keda realiza den ultimo añanan. Nos no a haya un solucion convincente pa e problema di desperdicio, ni den sentido di ley y mucho menos den loke mester sucede concretamente. Gobierno ta keda nenga di crea un manera solido pa percura cu Serlimar su clientenan no por scapa pagamento y ta parce cu ta conscientemente ta dirigi e asunto den e direccion cu e empresa estatal mester bay parlamento tur aña pa pidi un complemento riba nan entrada pa por cera buki. By the way, nos ta spera cu e ta bira un custumber pa nan cera buki, pasobra durante varios aña ‘cera buki’ no tabata existi den e practica empresarial di e compania aki.

Nos a keda pega cu un ley di financiamento di partido politico cu no ta hunga ningun papel den e actual eleccion, pasobra tur partido sa cu e ta nada mas cu un formalidad, bunita staciona unda e no por stroba. Nos a keda pega tambe cu e institucion Ombudsman, di cual hopi ta spera cu e por significa un poco mas seguridad pa e ciudadano, un forma di denuncia mal practica den gobernacion. Nos tin e inclinacion di no comparti e optimismo aki, pasobra e casi disgusto cu cual ta trata e proceso di preparacion ta e mihor indicacion pakico e institucion aki ta bay topa cu hopi contratiempo y hasta enemistad, pasobra su actuacion ta linea recta contra e actual cultura gubernamental, unda ta parce cu nos t’ey pa nan y no al revez.

Nos a keda pega, mas cu tur cos, cu medidanan cu lo a cuminza limita e posibilidadnan den gobernacion pa corupcion grandi y na nivel halto. Si no no cuminza eynan, anto nos no ta bay haci nada tampoco cu e corupcion menor. Aparentemente e no ta suficiente señal cu djis aki nos por tin un parti sustancial di e anterior gabinete tras di tralie, pero cu nada no a cambia y e posibilidadnan pa enriquece bo mes como mandatario a keda mes grandi. Ta corecto pa mustra cu e ambiente ‘benevolente’ cu tabata reina den e partido responsable pa esey tin tur cos di haci cu loke a pone cu Aruba proporcionalmente ta campeon mundial den perde mayor parti di un gabinete na man di husticia, pero kico a sucede realmente pa haci e cosnan aki imposible den actualidad y futuro? Di e manera aki e practicanan aki, cu no tin nada di haci cu bon gobernacion, ta sigui sucede y cada vez nos lo haya sorpresa nobo riba e terenonan aki, sea cu ta trata di permiso, o tereno pa vivienda o empresa, o licitacion mancaron pa faborece amigo y famia. Importante ta cu tur politico cu logra haya puesto e siman aki, mester por sa cu no tin solamente ‘screening’ ora nan drenta, pero principalmente ora nan sali, pa nos por sa kico nan ta hiba loke no ta di nan, sino di nos. No ta remarcable cu casi tur nos politiconan ta aplaudi cu mester bin screening, pero nan no ta menciona e screening despues cu nan ‘sirbi nos pais’? Pregunta: un tienda ta controla bo ora bo sali, no ora bo drenta…toch?

LJMADURO – 22-JUN-2021