Temporada di Carnaval a cuminsa oficialmente y ya caba directora di Departamento di Higiena y Inspeccion di Alimento, sra. Yvette Geerman a anuncia cu e temporada aki lo ta uno hopi cortico, druk y cu nan ta bay ta basta activo.
Manera e añanan anterior, e departamento mencion ta bay subi caya pa haci control durante tur e actividadnan carnavalesco. Nan ta bay realisa control a base di esunnan cu ta anda cu cuminda mester cumpli cu e reglanan di higiena y cumpli cu ley. Ya pa basta añanan nan ta trahando riba e puntonan di atencion y nan lo keda ripiti nan pa loke ta trata higiena.
“Nos ta bay t’ey. Nos ta bay ta mesun stricto cu tur e otro añanan”, el a declara na Bon Dia Aruba.
E ta recorda cu cada ken tin su propio responsabilidad, y nan como departamento di Salud Publico nan rol y nan responsabilidad ta pa cuida comunidad di Aruba, y e turistanan. Mientras cu esnan cu ta traha cu cuminda tambe tin nan responsabilidad, el a laga sa. Sra. Geerman a bisa cu esunnan cu ta traha cu cuminda mester ta consciente cu nan ta anda cu salud di hende, y nan tin cu cumpli cu ley.
Actua conforme ley
Ora e ta papia conforme ley, e ta referi na e famoso carchi berde cu tur hende cu ta manipula cu cuminda mester tin. “Esey ta un di nan, pero tambe tin otro puntonan cu mester t’ey cu ta e reglanan di higiena cu tambe nan mester cumpli cu nan”, el a declara na Bon Dia Aruba.
Sra. Geerman a bisa cu di nan banda nan lo keda semper habri y nan ta dispuesto pa guia, conseha y coaching, unda cu por. El a indica cu esunnan cu ta anda cu cuminda por sa miho e motibo pa kico nan ta bay den e direccion cu nan lo desea di bay. Specialmente e reglanan di higiena su importancia y pa kico. P’esey nan ta dispuesto pa duna conseho unda cu nan por riba e tereno aki.
Tambe nan lo sigui cu nan campaña pa duna nos comunidad mas conscientisacion riba tereno aki, ya cu nan como salubridad publico ta keda kere di duna hende mas instrumentonan pa nan por bira mas consciente. “E hendenan mes ta ripara e importancia di higiena”, el a bisa.
