Controla y maneha COVID-19 ta keda prioridad den agenda ehecucion nobo

Hulanda y Aruba a compromete cu ta bay controla y maneha COVID-19 den e agenda di ehecucion di e landspakket firma entre ambos pais. E tema di cuido ta un di e capitulonan importante den e landspakket cu ta condicion pa Aruba por a y sigui haya sosten di likides for di Hulanda.

Meta di e control di COVID-19 ta pa garantisa e continuidad di cuido intenso y un organisacion eficiente di cuido, banda di realisacion di un structura di cuido fuerte y pagabel.

E plannan cu Aruba mester implementa a keda hinca den e agenda di ehecucion pa e siguiente kwartaal cu apenas a keda firma pa Prome Minister Evelyn Wever Croes y Secretario di Estado Raymond Knops.

A sigui e consehonan di e Outbreak Management Team, OMT pa por a maneha e capacidad di cama di ICU na Aruba, y tambe fortifica e servicionan di salud publico den sigui e desaroyo di COVID-19. Pero tambe a traha hunto pa percura cu e material di proteccion personal, PPE’s, y cu e capacidad di test tambe a keda na nivel y suficiente. Tambe a inicia un control di sindroma y a garantisa capacidad di air-ambulance, ademas cu a cumpra e vacuna contra COVID-19 y a ehecuta e programa di vacuna, na momento cu esaki tabata disponibel. Tur esaki tabata sosten di Hulanda.

Plan di reduccion di gasto

Pero pa baha gasto structuralmente, y den cuadro di efectividad, lo pone riba mapa cua ta e duplicacion di mas di e oferta di cuido den e diferente institutonan y tambe pone otro ineficiencia riba papel pa asina reduci esakinan. Hulanda ta enfatisa cu e hospitalnan den region di Reino Hulandes mester traha cu otro, y yega na palabracionnan administrativo. En todo caso esaki lo mester resulta na reduccion di e cantidad di hende cu ta bay den exterior pa trato medico, pa medio di ampliacion di e oferta di cuido den region di Caribe di Reino mes, unda e cuido di specialista ta halto. Hospitalnan tambe mester haci compra di material den conhunto, cu ta inclui remedi, medio, material y aparatura necesario.

Mester racionalisa cuido di laboratorio y reduci e cantidad di laboratorio priva y e specialistanan cu ta cay bou AZV mester drenta servicio di hospital. Hulanda kier un colaboracion mas fuerte entre e cuido di prome y di dos liña, ademas cu mester re-calcula e manera con determina e tarifa di pago. Esaki mester sosode a base di un palabracion entre AZV y e autoridad di cuido di Hulanda.

Ya caba a cuminza haci investigacion riba con pa desaroya y implementa efectividad y eficiencia di restructuracion di e servicio di cuido, y den e agenda di ehecucion ta papia atrobe di contribucion propio y evaluacion di e pakete basico di AZV.

Locual ta guia e implementacion di e medidanan aki ta e palabracionnan haci den e asina yama Vierlandenoverleg. Te ainda no a haci palabracion separa pa ehecucion di e medida.