Den conexion cu e proyecto Nos Tera Nos Pais, minister di Naturalesa Ursell Arends a informa cu e contratistanan di Serlimar cu a wordo aloca na Bureau City Inspector door di ceramento di dump Parkietenbos a haci nan prome trabao na Santana di Playa.
Den esaki, a expresa cu a duna na e contratistanan e oportunidad pa opta di traha cerca un departamento nobo, restructurando e servicio di ploegen bou Santa Rosa, Bureau City Inspector, Fundacion Parke Nacional Aruba y Serlimar. E contratistanan di BCI a fortifica e esfuersonan pa asina atende cu melding di entre otro dump ilegal. El a gradici na e contratistanan cu a labora ayera pa e bienestar di e isla.
Nos Tera Nos Pais ta un proyecto den cual personanan cu ta forma parti di ploegnan di Serlimar y e ploegleiders por a asisti na ricibi informacion for di diferente departamento di gobierno den un exposicion cu a tuma luga na luna di october ultimo.
Den exposicion aki, a elabora tocante e restructuracion di ploegen pa haci diferente tipo di tareanan pa departamentonan di naturalesa pa por ehemplo piki sushi, haci limpi den dam, atende cu melding pa dumpnan ilegal y mas.
Durante e exposicion departamentonan manera Santa Rosa (DLVV), Serlimar, BCI y FPNA a presenta e tareanan specifico cu tin pa haci den nan organisacion. Contratistanan a haya e oportunidad pa dicidi unda nan kier a bay traha, of tambe si ta opta pa no sigui duna servicio na gobierno mas of na e departamento concerni.
Minister di Naturalesa Ursell Arends a splica cu e motivacion tabata pa reduci e gastonan di personal di Serlimar, na beneficio di rescata e compania estatal. Alabes ta enfoca riba e tareanan primordial di tene Aruba limpi, y tambe maneho y ehecucion di leynan di medio ambiente cu mester tuma luga, den cuadro di e maneho nobo di desperdicio.
