Segun minister di Labor sr. Paul Croes, e problematica di cheap labor cu tanto ta afecta nos mercado laboral ta un preocupacion cerca nan. E mandatario a declara na Bon Dia Aruba cu mester wak cu e problema aki tin su fundeshi. Y e fundeshi ta esunnan cu ta tuma hende den servicio pa realisa den forma ilegal trabou na un prijs mas barata.
El a referi riba un caso cu a sosode recientemente na Hilton hotel, unda tabatin persona ilegal haciendo trabou di verf. Segun minister di Labor nan ta bay sigui bringa e problematica aki pa e tipo di suceso asina no sosode mas riba nos isla.
E ta haya cu gobierno den su rol di control por realisa trabou di manda Warda Nos Costa na diferente establecimento. Tambe nan por manda inspector di Labor pa controla e cumplimento riba ley laboral, y tambe DIMAS tin su personal cu ta haci control riba situacion legal di e trahado di afo y nan permiso di labor. Sinembargo el a señala cu “gobierno no por t’ey tur caminda. Gobierno ta haci su esfuerso di tur ministerio”.
Mas esfuerso
P’esey e mandatario ta haya cu primeramente esunnan cu mester tin tur cos na ordo ta e dunado di trabou cu ta esun cu ta emplea e persona ilegal.
E ta enfatisa cu gobierno ta haciendo un esfuerso fei tur ministerio pa frena entrada di persona ilegal pa medio di personal di Warda Nos Costa y diferente institucion uniforma.
Sinembargo si tin hende di afo cu ta keda di un forma ilegal na Aruba y trata di subi mercado laboral, tanto departamento di Labor y Dimas ta cera e portanan pa nan no por haya un permiso pa traha legalmente. Na e momento ey e ta bira un persona cu ta indocumenta pa subi mercado laboral.
Ta asina cu nan ta busca un forma pa traha di un forma mas barata pa cierto companianan, y lamentablemente tin compania cu ta tuma e persona aki den servicio, segun e mandatario.
