Contrario cu Aruba, ABN AMRO ta bay cera cuenta pa esnan biba na Corsou y St. Maarten

Aruba ta considera neutral pa loke ta risico

Aruba a haya un evaluacion neutral di ABN AMRO y a pesar di no ta presente riba e isla, residentenan por mantene nan cuenta cu e banco Hulandes. Esaki contrario na residentenan di Corsou, St. Maarten, y islanan BES.

ABN AMRO a tuma e decision aki algun luna pasa cu a lanta un ola di protesta di residentenan na Corsou en particular cu a busca sosten for di e Comision Fiho pa Asuntonan di Reino den Tweede Kamer. E comision a manda pregunta pa e Minister di Finanzas di Hulanda riba e decision di ABN AMRO cu ta di estado Hulandes, despues cu mester a rescata e institucion priva di bancarota durante e crisis bancario di 2008/2009. “E ta keda na un banco pa determina su strategia y dicidi cu cua cliente e kier tene un relacion comercial of no,” Minister Wopke Hoekstra a informa e Comision Fiho.

E preguntanan di e Comision Fiho a sali na April, despues di a ricibi un carta di un residente di Corsou, L.H di Februari y tambe un mocion di Conseho Insular di St. Eustatius na Maart. Den su carta, L.H ta expresa su disgusto riba e intencion di ABN AMRO pa termina e cuentanan coriente y otro producto bancario di y pa clientenan cu ta residencia na Corsou. E mesun decision di ABN AMRO a conta pa e otro cuater islanan menciona. Den e carta di L.H. ta mustra cu ABN AMRO no ta cera cuentanan di clientenan cu ta residencia na Aruba, y como tal, ta haci distincion entre e diferente partinan di Reino Hulandes. “Mi por imagina cu e intencion di ABN AMRO ta causa inkietud cerca Hulandesnan riba e cinco islanan. E posibilidad di por haci uso di un cuenta di pago ta un condicion importante pa por participa den e trafico social. Mas ainda si ta trata aki di eliminacion di un relacion di cliente cu ta existi pa hopi tempo.” Hoekstra a bisa cu a base di preguntanan a bay den un combersacion cu e banco.

“Pa cuminsa, e ta keda na un banco su mes pa determina su strategia y cu cua cliente e ta cera of sigui cu un relacion comercial. Cualkier banco, basa di e Ley pa Evita Labamento di Placa y Financiamento di Terorismo (Wet ter voorkoming van witwassen en financieren van terrorismo, Wwft), ta obliga pa haci su calculacion di risico y acopla e maneho di aceptacion di cliente riba e analisis, y tuma eventual medida pa mitiga e risico. E ley ta obliga un banco pa kibra relacion cu un cliente si a constata cu no por mitiga e risiconan of si e cliente no por duna e informacion necesario pa un bon evaluacion di risico. Un risico eleva no ta nifica si cu mester rechasa un grupo di cliente den un forma di categoria.”

Hoekstra a sigui splica cu e banco den cuestion, bou tur circunstancia tin un responsabilidad cu cliente y por unicamente elimina un cuenta si tin bon argumento y cu bista riba e interes di e cliente. “Mi a compronde di ABN AMRO cu e ciere di cuentanan den e parti Caribense di Hulanda en todo caso ta temporal, cu bista riba e proposicion di ley ‘Wet beschikbaarheid basisbetaalrekening Nederlanders in het buitenland van het lid Sneller.’ E proposicion aki ta regla cu Hulandesnan cu ta biba pafo di Union Europeo ta keda cu derecho riba un cuenta basico di pago. “Mi a compronde cu ora cu ABN AMRO ehecuta su proposicion pa cera e cuentanan, lo asisti e clientenan te cu seis luna pa haya otro cuenta di pago, pa por haci cierto transaccion manera ricibi pensioen,” e Minister di Finanzas di Hulanda a splica.

Aruba ta risico neutral

Hoekstra tambe a puntra ABN AMRO di con no a inclui Aruba den e decision pa cera cuenta di cliente. “E banco a informa mi cu su strategia general ta dirigi riba e region Norte y Occidental di Europa. Banda di esey, ABN AMRO ta hiba un maneho di pais unda cada region ta haya su evaluacion di risico. ABN AMRO ta propone pa usa fuentenan di confia pa su maneho di pais, manera rapportnan di supervision y di organisacion mundial. Indicadornan pa un risico mas eleva ta regionnan geografico cu ta identifica como zonanan cu risico mas halto pa corupcion y otro actividad comercial. ABN AMRO ta termina relacion cu clientenan cu ta biba permanente den paisnan cu tin risico eleva y ta keda pafo di e espacio economico Europeo (EER) No ta tuma cliente nobo pafo di e area aki. Segun Wopke Hoekstra, e sistema cu ABN AMRO a usa como tal ta mustra cu cuentanan na Corsou, St.Maarten y islanan BES ta hisa e risiconan pa e banco, mientras cu e mesun sistema a pone cu Aruba a haya un evaluacion neutral.

E Minister di Finanzas di Hulanda a bisa cu el a cuminza cu combersacionnan cu St. Eustatius riba e problematica di nivel di servicio bancario na e isla y lo purba saca afo, hunto cu e unico banco presente, pa mira cua ta e problemanan y con por elimina esakinan.

ABN AMRO a cera su actividadnan bancario comercial na Aruba den principio di decada 2000. E tempo ey e banco a cera diferente filial rond di region y e establecimentonan bancario na Corsou y Aruba a pasa pa RBTT cu despues a bira RBC. Despues di e crisis bancario mundial na 2008/2009, ABN AMRO mester a haya un rescate financiero for di Estado Hulandes pa evita su bancarota. Desde e tempo ey, Estado Hulandes ta doño di accionnan di e banco.