Gobierno ta laga e cuenta ambiental pa Aruba innecesariamente
Un fuente anonimo y no politico a lek e contractonan entre Citgo y Aruba y awor Bon Dia Aruba tin un miho bista riba kico gobierno ta informa y kico ta den e documentonan original. Un conclusion nos por tuma caba cu ta den liña di e conseho di Raad van Advies: contrario cu gobierno ta declarando, riba tereno ambiental ta laga un buraco grandi pa cuenta di Aruba awor y den futuro.
Esaki ta un parti di e articulo cu awe por haya completo den e corant Bon Dia Aruba
E conclusion nos a tuma a base di lesa e diferente contractonan manera e Definitive Participation Agreement firma riba 10 di juni 2016 entre Aruba, Citgo Holding (e subsidario di PDV na Merca, cu ta un subsidario di PDVSA na Venezuela), Citgo Aruba Refining y Citgo Aruba Terminal (ambos companianan local). Tambe nos a lesa e contractonan Refinery Lease Agreement, e Terminal Lease y Service Agreement, e Umbrella Dispute Settlement Agreement y esun cu PDV Holding Parent Guarantee.
Den contractonan nos tambe por haya informacion riba kico Refineria di Aruba (RDA) lo tuma como responsabilidad ambiental momento cu Valero ta traspasa tur cos na Pais Aruba. Riba un pagina nos por mira cu e compania estatal mester limpi den un termino di 12 luna, momento cu e contracto di lease ta efectua. Aki bou por nos ta menciona un par pero riba e pagina aki por mira e pagina den e contracto cu Citgo:
Kita of drecha e asbest kibra den e edificionan
Limpia e asbest cu ta keda den containernan (cu ya tin corosion)
Kita material radioactivo y otro desperdicio peligroso
Esaki lo bay riba gastonan di RDA cu ta den man di gobierno y mester remarca cu e limpieza mester tuma luga prome cu Citgo lo start e refineria. No ta conoci con RDA lo bay paga esaki. Tambe locual ta para den e contracto ta otro di locual Martin Parrish (vice presidente Alternative Fuels) di Valero y minister di Energia Mike de Meza a bisa riba e dia cu gobierno a firma e Settlement Agremeent cu Valero. Sr. Parrish a indica cu Valero lo tuma su responsabilidad pa e limpieza di e dump di asbest, asina el a contesta riba preguntanan specifico di Bon Dia Aruba. Y tambe minister De Meza a enfatisa despues cu ta Valero cu lo bay haci esaki.
Condicionnan menos estricto
Un otro cos ta cu minister De Meza, cu tambe ta encarga cu Medio Ambiente, for di comienso di e proyecto reapertura di refineria, a bisa cu lo bay mara e operador na condicionnan ambiental mas estricto cu e operadornan anterior. El a bisa cu di Valero gobierno no por exigi mucho pa motibo cu tempo di gobierno di MEP durante e traspaso pa Coastal, nan a kita tur responsabilidad di e operadornan pa e sushi laga den e periodo bayendo bek te na Lago. Tambe minister De Meza a bisa den e caso di Valero no por exigi mucho tampoco pasobra nan a tuma e contracto cu e mesun condicionnan (suavisa) over di Coastal.
Permiso
E mandatario tambe a declara cu tampoco por exigi di e operador nobo Citgo awor cu nan lo bay haci tur cos limpi. E intencion ta cu prome cu lo haci un estudio profundo pa despues por sa exacto kico ta pa cuenta di Citgo y kico ta keda pa Pais Aruba. Despues lo pone e condicionnan ambiental riba papel y esaki si lo bay ta mas estricto y lo bay vigila, mas asina minister De Meza a sigura Bon Dia Aruba y otro prensa varios biaha.
Sinembargo e conseho di Raad van Advies tabata hopi critico riba e parti aki. A base di esaki y tambe e ley di Citgo cu awe tardi parlamento lo cuminsa trata, por mira cu gobierno kier haci diferente cambio den e ley Hinderverordening y Hinderbesluit, cu basicamente ta un di poco leynan cu por condiciona companianan na exigencianan ambiental (pero tambe pa proteha siguridad y salud). Punto crucial ta cu gobierno kier saca refinerianan for di e ley aki y traha un otro ley (Landsbesluit) unda lo bin na exigencianan special.
Pero esaki ainda no ta bay ta na vigor momento cu riba 1 di october e trabou di preparacion mester cuminsa, den caso parlamento lo aproba e ley. Gobierno a indica cu tanten e condicionnan ambiental no ta cla (dus despues di e estudio) e condicionnan bieu ta conta pa Citgo. Esey ta e permiso bieu di Valero (prome Coastal), yama Hindervergunning.
Raad van Advies no por a duna un bon conseho riba esaki, pasobra nan no tabatin e documento aki. Y gobierno tampoco a contesta e preguntanan di e organo consultativo riba esaki pa duna mas claridad riba e condicionnan cu ta para den e permiso bieu, cu mester bay conta tambe pa Citgo den e prome periodo.
Aparentemente gobierno no por a duna pasobra nan a bisa cu e documento di e permiso ta ‘perdi’. Pero Bon Dia Aruba tin e documento den su poder.
