Den practica semper sa evadi e reglanan!
E actual polemica cu a surgi entre sindicato y ministro encarga cu Labor, y e gremionan empresarial ta un debate cu a surgi caba den e negociacionnan prome cu e cambionan den ley laboral di april 2013. Kico tabata e caso? E ministro di Labor di e tempo ey tabata desea di elimina e articulo 1613X, proponiendo e introduccion di e prohibicion di cierto cantidad di contracto di corto duracion tras di otro, hunto cu e introduccion di e ley riba ‘uitzendwerk’. Esey a bira efectivo tambe, den e sentido cu awor tin un maximo di dos aña di empleo a base di contracto di corto duracion, y despues e dunado di trabao lo mester duna e trahado un contracto pa tempo indefini. E idea tabata cu di otro banda lo a elimina e articulo 1613X, cu en berdad ta algo cu no ta existi ningun caminda den Reino Hulandes. E sindicatonan e tempo ey a bay di acuerdo cu e introduccion di e proteccion contra contracto cortico eterno, loke ta na su luga, pero a opone pa aboli e articulo 1613X.
Loke ta sosodiendo awor ta cu tanto e ministro actual, como tambe e gremionan empresarial a bolbe na mesa pa regla e asunto cu a keda na mita caminda dos aña pasa. Claro cu e sindicatonan ta opone esaki, pero esey ta mas bien e posicion di principio contra esun di e ministro y e gremionan empresarial. Pero kico ta e practica di e articulo singular aki den nos economia?
Ban cuminsa cu duna e categoria di situacion cu ta cay bao di e ley aki: contracto di corto duracion ta permisibel pa reemplasa un trahado permanente ausente pa via di por ehemplo enfermedad of relaciona cu embaraso; empleo den cuadro di un proyecto di e empresa; relaciona cu trabao di temporada; y trabao cortico y iregular.
E situacion cu na 1992 a hiba na creacion di e articulo aki den nos Codigo Civil, tabata e situacion unda cu hopi trahado local, tabata haya solamente contracto di corto duracion, cu tur e desbentaha cu esey por tin pa nan y nan famia, entre otro e problema di haya prestamo. Y na unda e practica di 1613X a hiba nos den mas di binti aña desde su institucion? E practica den sector turistico, pero tambe den otro ta cu e stranhero, cu ta renoba permiso cada aña, ta e trahado permanente, cu segun instruccion di gobierno mester haya un contracto indefini, aunke cu ta pa un aña so e ta haya permiso.
E situacion aki a causa bastante problema tambe, pasobra ora un dunado di trabao no haya extension di e permiso pa e trahado stranhero, keto bay e tabata hinca cu e contracto pa tempo indefini. Awendia un dunado di trabao ta percura pa e tin un clausula den e contracto pa por sali di e situacion si no extende e permiso. Banda di esey, esun cu por haya trabao a base di un contracto cu ta cay bao un di e cuatro categoria cu e ley conoce ta e Arubano so! Y esey ta logico tambe, si ta practicamente imposibel pa trece un stranhero pa por ehemplo bin traha tres luna den temporada di Pasco te Carnaval, of otro temporada di ‘high season’, y despues mande su cas. E unico excepcion cu tin ta den construccion ora cu pa un proyecto mayor ta trece un cantidad di trahado stranhero, manera recientemente tabata e caso na Riu Antillas.
Nunca ningun mandatario encarga cu Labor, ni e sindicatonan, ni e gremionan empresarial tabata dispuesto di reconoce e situacion contradictorio aki. Y esaki tin como consecuencia cu con cu bo bira e asunto, bo no por remedia nada tanten ta asina cu ta practicamente e trahado local so por ta riba un contracto di corto duracion, y no e stranhero.
Banda di esey, ta logico cu hopi dunado di trabao traves di aña a sa di maneha nan asuntonan di tal manera cu nan por a traha cu e cuatro categorianan aki. Cu un poco creatividad ta posibel pa hinca e contracto cu nan tin pensa den un di e categorianan. E trahado cu ta bay haya trabao talbes sa cu e condicion no ta cuadra full cu berdad, pero e no tin beneficio di bay keha, pasobra ta trabao el a haya!
Conclusion ta cu e cambio di ley cu a introduci na 1992 nunca tabatin e efecto positivo cu a spera, pero igualmente su abolicion awor lo no tin efecto grandi. E cambio proponi awor no ta cambia e situacion di e trahado local, cu ta e so por ser contrata bao di un contracto cortico. Mientras tanto, tampoco e limitacion te dos aña pa contracto cortico ta duna tur proteccion, pasobra e dunado di trabao por opta pa no continua cu e trahado den un contracto permanente. Den e mundo aki simplemente no tin garantia eterno pa nada.
