ORANJESTAD – Un punto di e proyecto di Watty Vos Boulevard ta relaciona cu e mesun contract. Minister di infrastructura, Otmar Oduber ta indica cu e contract aki ta saca completamente for di man di gobierno y di DOW, e organisacion di e trabounan.
E ta cualifica e contract aki como uno ‘abstracto.’ Unico cos cu e ta bisa ta cu gobierno por actua na momento cu e compania ta iresponsabel.
Insiguridad den trafico
Ya caba gobierno a actua y a yega di duna tres boet na e compania Mota Engil, encarga cu e proyecto aki. E boet aki ta relaciona cu insiguridad den trafico. E mandatario a trece dilanti cu diadomingo ultimo, banda di 8or di anochi tabatin cinco rotonde, cu pa un motibo of otro Mota Engil y no DOW, no a percura pa generator di luz ta wordo cendi.
Di biaha –segun e mandatario- DOW a notifica nan, y Mota Engil a haya un advertencia cu esaki ta e delaster biaha, ya cu e por trece peliger den trafico. Esaki tambe ta un motibo pa impone un boet ariba e compania aki. Pero nan no por pone Mota Engil responsabel tanten cu no ta wordo mira cu ta un peliger den trafico nan a ocasiona.
Mirando cu tin hopi trabou cu ainda mester tuma luga, e mandatario ta pidi nos comunidad hopi pasenshi. Mas ainda di e pasenshi cu nan tabatin durante e trabou aki. DOW di su banda ta purba organisa cu e contratista pa evita cu e caos por bira mas grandi. E ta spera cu na final di augustus ora e proyecto ta wordo entrega, nos comunidad ta bay sinti alivio atrobe.
