Contrabandista ta tira migrantenan for di boto pa evita aresto, segun Wardacosta Griego

(AP) – Contrabandistanan cu ta hiba migrantenan for di Turkia pa e islanan oriental di Grecia den dos caso a adopta e tactica peligroso di tira algun pasahero for di nan speedboat den lama pa evita nan captura door di Wardacosta cu ta persigui nan, segun autoridad Griego a bisa.

E ocho migrante cu a tira den lama a ser rescata den ambos caso cu a registra durante fin di siman. E incidentenan ta bin mientras cu contrabandistanan ta usando speedboat, en bes di e botonan inflabel di motornan chikito cu nan a usa pa añanan y ta adopta tacticanan mas y mas agresivo pa evita patruyanan maritimo Griego.

Siman pasa, Wardacosta a cuminsa tira y mata un migrante despues cu un speedboat supuestamente a dal su barco den Lama Egeo durante un persecucion.

Wardacosta Griego a bisa diamars cu den un caso den fin di siman, un Palestino y un homber Afgano cu tabata pilotia un speedboat tambe a purba di dal un boto di patruya cu tabata persigui nan banda di e isla di Kos. Despues supuestamente nan a obliga cinco pasahero bula den lama y huy bay direccion di e isla mientras cu wardacosta a para pa rescata e migrantenan.

Trinta migrante cu tabata abordo di e boto a ser localisa despues riba tera seco, mientras cu e dos supuesto traficante a keda deteni.

Den un di dos incidente dilanti di e isla di Symi, a forsa tres migrante pa bula for di e boto di e contrabandistanan den persecucion, Wardacosta Griego a bisa. Esey a permiti e contrabandistanan regresa na awanan di Turkia cu e resto di e pasaheronan, cu a ser busca pa un barco di Wardacosta di Turkia.

E tres migrante rescata den awanan Griego a bisa cu nan a paga 4,500 dollar cada un pa e biahe, segun un comunicado di Wardacosta Griego.

Gangnan di contrabanda a adapta den e ultimo lunanan pa trata cu vigilancia estricto Griego di e awanan di e parti este di Lama Egeo. Ademas di e uso agresivo di botonan di velocidad halto, nan a bira tambe pa rutanan nobo a traves di Lama Egeo central, mientras cu e cantidad di migrantenan cu ta haci e biahe mucho mas largo for di Libia pa e isla Griego di Grita a aumenta.

Segun e data for di e agencia di refugiado di ONU, aproximadamente 31,500 migrante a yega Grecia ilegalmente e aña aki. Esey ta un poco menos cu e cantidad cu a yega Italia y Spaña, e destinacionnan principal pa hende drenta Europa ilegalmente.