Continuacion: Sense y nonsense tocante mercado laboral

Den nos editorial di ayera nos a enfoca riba varios aspecto di mercado laboral. Pero tin mas asunto pa atende. Con ta para por ehemplo cu asistencia na esnan cu ta busca trabao? Pa cuminsa, gobierno tin un servicio pa persona cu ta busca trabao, cu na e momento aki ta opera bao di e Departamento di Progreso Laboral (DPL). Esaki ta un servicio obligatorio y gratis, segun tratado internacional cu Aruba a ratifica. E tratado ta conoci como ILO convention no. 88 (Employment Service). Bao di e tratado aki Aruba mester brinda un asistencia na esnan buscando trabao gratis y e nivel di servicio mester ta aceptabel.

Na Aruba,  e departamento aki ta tambe e instancia cu ta duna conseho riba peticion pa permiso di residencia pa traha na Aruba. Mirando e cantidad di trahado di exterior, esaki a bira un tarea grandi, ya cu nos ta papia di casi dies mil peticion riba cual mester duna conseho na e instancia cu ta otorga e permiso (DIMAS). Esey significa tambe cu den casi dies mil caso un dunado di trabao a registra un puesto vacante den nan empresa na DPL.

Di otro banda, nos por mira cu esnan cu ta registra na DPL pa trabao ta apenas 1000 pa 1500 persona pa aña, manera recientemente un vocero di  e departamento a duna di conoce. No a divulga cifra tocante e cantidad di persona cu efectivamente a haya trabao traves di e departamento. Pero por deduci cu, hasta si tur persona a haya trabao, y por lo tanto entrada di un trahado stranhero no tabata necesario, ainda gran mayoria di e puestonan ofreci efectivamente a bay na persona di exterior. Pero e storia ta un tiki mas complica cu esaki. E departamento mes ta consciente cu no ta tur hende cu ta busca trabao ta acudi na e departamento. Ta p’esey e dunado di trabao mester proba cu el a haci un esfuerso via aviso den corant pa haya trahado local. Den caso cu e empresa tin un trahado stranhero na bista of cu ta trahando caba, ta cuminsa e wega pa troce e asunto di tal manera cu no ta honra ningun oferta di trahado local. Den caso cu e departamento manda un persona solicita, ta bira un tiki mas complica pa deshaci di esey, pero echo ta keda cu di tur manera e cantidad di solicitante registra na DPL ta hopi menos cu e cantidad pa cual ta pidi permiso.

Con efectivo e servicio gubernamental ta den su tarea di busca trabao ? Ki porcentahe di e grupo total cu tur aña ta busca trabao y haya trabao, ta logra esaki via e departamento? Nos por tuma como un benchmark di Hulanda, cu e servicio extenso di e “arbeidsbureau” nan Hulandes no tabata surpasa 25% di e total di hende cu ta busca y haya trabao. Kiermen cu na Hulanda, tres di cada cuatro persona cu busca y haya trabao ta logra esaki riba su mes, o cu ayudo di servicio profesional no gubernamental, manera e red extenso di ‘uitzendbureau’ cu e pais conoce. Lamentablemente no ta conoci si tin dato oficial den e sentido aki. Pa añanan caba nunca nos ta mira mas cu e simpel porcentahe di desempleo cu ta aparece un biaha pa aña. En todo caso nos por supone cu e grupo cu ta busca y haya trabao via DPL ta solamente un fraccion di e total cu anualmente ta logra haya trabao. Esey ta di lamenta? No, pasobra e ta proba cu mayoria di nos hendenan ta bon capaz di busca y haya trabao riba nan mes, sin cu ningun hende mester tene nan man. Esey nos ta desea, hende cu iniciativa cu ta tuma rienda di nan mes bida?

Di otro banda, nos no tin ningun informacion cualitativo di e grupo desemplea, cual subgrupo por distingui entre nan, ki educacion o experiencia di trabao na tin, cual ta e sectornan cu ta logra haya trahado local y cual no, etc. Naturalmente cu esaki no ta tarea exclusivo di DPL, ya cu e departamento di Labor mes ta encarga cu produci cifra di mercado laboral. E tarea fundamental aki tambe a keda un yiu adopta, y te awe ainda e departamento no ta conta cu e instrumentario basico pa por entrega cifra di mercado laboral manera mester ta. Ta p’esey e departamento ta keda pega cu un trabao deficiente, talbes no pa falta di boluntad o conocemento,pero pasobra despues di e intentonan serio den inicio di añanan 90, nunca mas a mira un intento berdadero pa establece e sistema informativo cu informacion periodico y cu mas detaye pa cada sub sector y tipo di trabao, cu ta realmente loke nos mester.

E consecuencia nos ta mira den nos medionan di comunicacion, unda hopi biaha ta vocifera opinion tocante trahado stranhero, trahado local, etcetera, basa riba tur sorto di consideracion menos dato real di e asunto. E cos mas straño di henter e asunto ta keda cu nos no ta tende e personanan cu ta  traha den e ramo aki mes expresa un opinion tocante esaki. Por algo será.