ORANJESTAD – Den un reciente entrevista, Christiaan Henny a mustra su interes pa studiantenan por siña di un forma adecua, ora nan ta enfrenta cu materianan of mente ta cera den buki.

“Mi meta no ta pa solamente yega rond di mundo, pero pa esunnan cu ta rond di mundo por siña di e metodonan. Pa nan por sinti cu nan no ta nan so, y por yega leu cu nan estudio.” Henny lo atende varios pais na Europa, anto te septemeber ta pa bin Aruba bek, manera aña pasa, ‘no ta sigur precisamente, pero sigur mi ta yega’.

“Aña pasa mi a bin duna e tayer na algun scol. E muchanan di edad di 7 pa 8. Mi tambe a bay algun middelbare school, pero mi enfoke y esunnan cu tin biaha mester mas ayudo ta pa MBO y HBO”, Henny a bisa.

Sinembargo, Henny ta bisa cu na Aruba su experiencia tabata uno ‘super bon’. Agregando cu mucho studiante a tuma e conseho di studia manera e metodo di studie coach, ‘cu ta keda siña y mustra interes’.

E idea a bin pa studiante no sufri of sinti cu no por, manera den su propio experiencia. “Mi a splica cu mi mes a haya hopi problema ora mi tabata den basis, despues middelbare school. Mi a keda sinta, mi mester a bay bijles. Miedo pa ora di haya mi cijfers, e berguensa dilanti famia of docente. Ora mi a yega universidad, eynan mi a ripara, pa ayudo di un otro meneer, con mi mester studia.”

Segun Henny, pa motibo cu su problema ta uno grandi y a causa daño den su manera di estudio, e kier yuda otro persona pa no pasa aden di locual el a pasa. “Mi kier mas hende por sa kico e ta encera, kico ta e proposito pa mi duna e herment y informacion necesario di con haci esaki.”

E tayer tin un total di 4 ora den video cu ta yuda pa concentracion. Tur cos lo wordo haci digitalmente. Un sistema di computer cu nan por wak con pa studia. E cursonan ta bay online y ta splica detayadamente con tin cu traha cune.

Henny ta remarca cu tin varios tema riba con pa planea, motiva, concentra, repasa tur cos, con ta forma adecua pa tuma nota. Tin un studie tool y con pa lesa buki. E ta siña bo tambe con pa pone atencion na e puntonan importante, ‘pa siña for di cabes y e no sali’.

E mercado unda cu e hoben mester mas ayudo den e parti di siña, e pensamento di Henny ta e grupo den middelbare school. Esunnan cu ta cabando y e comienso di ‘studententijd’ HBO, Universidad, MBO niveau 3 + 4.

E costo di inscripcion ta $8.95 dollar pa bira miembro di sistema, y ta haya na acceso na henter e tayer. Bon Dia Aruba a puntra con largo ta dura pa e persona ta cla den su manera di siña. E ta contesta cu ta depende di cada persona. “Tin cu ta dura largo, pa motibo cu gusta e sistema, pero tin algun cu ya despues algun luna ta laga di bira miembro. Pa mi, esey ta un elogio.”

Segun Henny no ta su idea pa gana placa di nan, pero miho pa nan por siña y sigui den e caminda. E ta bisa pa locual ta Aruba, tin studiante cu ainda ta sigui e metodo y ta comunica cune den cualkier forma. “Mi ta contento cu nan ta contento y mira nan reaccion. Reaccion di mucha, hoben, adulto cu ta studiando a bisa cu nan a haya bon punto y yega cerca mi bisando cu porfin a logra danki na e metodo. Esey ta locual mi kier tende.”