ORANJESTAD – Diabierna ultimo, dia 12 di april, un grupo di ciudadano a manifesta contra algun accion di gobierno. Aki nan manifesto.

“Manifesto di pueblo di Aruba contra engaño electoral”

Preambulo
Pueblo ta e unico fuente di autoridad politico. Pueblo tin e poder exclusivo pa crea e orden legal di nos pais. No ta suficiente cu gobierno ta wordo someti na e constitucion cu Pueblo a crea. Pueblo tambe mester tin un voz decisivo den e forma cu gobierno ta ejerce su autoridad. Den un democracia finalmente ta pueblo ta goberna!

Un manifestacion of marcha ta e ehercicio publico di e libertad di reunion pacifico y di declaracion publico di e opinion di ciudadano. P’esey un manifestacion ta e expresion legal di e deseo politico di ciudadanonan y un consecuencia directo di democracia. E libertad di manifestacion ta brinda tur ciudadano e oportunidad di expresa su opinion, especialmente esun cu no por haci uso di imprenta of otro medionan di comunicacion. P’esey e derecho di reunion pacifico ta e derecho di expresion mas democratico!

Engaño electoral
Pueblo pa medio di su derecho di voto ta duna confiansa y autoridad na partidonan politico pa

goberna nos pais. Parlamento y gobierno por conserva nan legitimidad democratico tanten cu nan ta conta cu e confiansa di e mayoria di electorado. Ora gobierno den un sociedad democratico no responde na e deseo di pueblo, e ta perde legitimidad. Pues, ora gobierno nenga voluntad di e mayoria e ta nenga e base democratico pa tur su accionnan. Cu otro palabra, ora Pueblo ta convenci cu promesanan no a wordo cumpli, e bos di Pueblo mester resona!

Den casi un aña y mey desde cu gabinete Evelyn Wever-Croes a asumi responsabilidad pa

gobernacion di nos pais, el a duna Pueblo prueba cu nan a gaña Pueblo votador y cu nan no por y no tin intencion di cumpli cu loke nan a priminti. E partidonan MEP, POR y RED cu ta forma e base politico pa e gabinete Evelyn Wever-Croes, a bisa y priminti Pueblo entre otro:
-Cu lo goberna sin medida. Loke Pueblo a wak y sinti ta medida y mas medida! Ainda tin

mas medida planea a base di e consehonan di entre otro IMF.

– Cu Aruba tabata tin un ‘mega debe’. Awor a base di raport (=cuenta nacional) di CBS ta

resulta cu Aruba nunca tabata tin niun mega debe!

– Cu lo baha edad cu un hende por bay cu pensioen. Nada a wordo haci!

– Cu MEP lo stop cu e mal custumber di privilegia ‘friends and family’. Loke Pueblo a wak ta

nada otro cu un sin fin di privilegio pa famia y amigonan y nombramento di famia y amigonan politico den gobierno y companianan estatal manera Elmar y RDA door di ministernan di MEP, POR y RED.

– Cu lo baha prijs di awa, di coriente y di combustibel. Loke Pueblo a wak y sinti ta cu prijs di awa y coriente no a baha y prijs di combustibel ta sigui subi. E causa principal pa e subida di prijs di combustibel bou di gabinete Evelyn Wever-Croes ta e aumento di accijs (= belasting riba combustibel) cu gobierno di MEP, POR Y RED mes a impone!

– Cu lo goberna cu 7 minister y cu no lo gasta placa na biahamento. Loke Pueblo a wak for di

prome dia ta cu gabinete Evelyn Wever-Croes ta goberna cu 8 minister oficial y por lo menos

un minister sin titulo. Ta biaha tur rond di mundo sin motibo y sin duna cuenta.

– Cu lo tin inverisonista cla pa inverti den e refineria cu lo wordo yama asina cu MEP POR y

RED drenta gobierno. Loke Pueblo a wak ta cu trahadonan ta sigui perde trabou den refineria

y cu gabinete Evelyne Wever Croes ta haci nada pa promove apertura di e refineria manera

tabata planea.

– Cu lo elimina parkeermeter, pero a haci nada pa logra esaki.

– Cu lo baha costo di gobernacion. Pero loke Pueblo a wak y sinti ta cu gastonan di gobierno a subi cu mas cu 200 miyon florin den e prome aña di gobernacion caba.

– Cu lo hisa salario minimo na 2500 florin. Salario minimo no a subi cu niun cen, pero costo di bida si a subi cu por lo menos 10% door di e aumento di BBO y otro medidanan di gobierno di MEP, POR y RED. Cu e aumento di impuesto indirecto manera IMF a conseha e gobierno recientemente, costo di bida lo subi ainda mas.

Deliberadamente e partidonan MEP POR y RED a gaña Pueblo den campaña. Un parti grandi di votadornan cu a vota pa e partidonan MEP, POR y RED, a haci esaki a base di e gañamento sistematico di MEP POR y RED. Pa e motibo aki mester considera loke MEP POR y RED a haci y e resultado di eleccion di september 2017, como ENGAÑO ELECTORAL (= kiezersbedrog). Door di cu e Gobierno actual y e coalicion di MEP POR y RED den Parlamento di Aruba ta ocupa nan funcionnan a base di engaño electoral, nan a perde e legitimidad democratico pa goberna nos pais.

Conclusion
Pa motibo di e engaño electoral y pa motibo di tur e otro abusonan di poder cu MEP, POR

y RED a y ta comete contra di Pueblo di Aruba, den nomber di Pueblo di Aruba, ta exigi gabinete Evelyn Wever-Croes pa:

1. Yama eleccion nobo pa Parlamento di Aruba a corto plazo y asina duna Pueblo e oportunidad pa scoge un Parlamento y un Gobierno cu si Pueblo por confia;

2. Para tur decision di gabinete Evelyn Wever-Croes cu tin consecuencianan economico of

financiero pa nos pais te despues di eleccion nobo pa Parlamento di Aruba;

3. Para tur forma di persecucion politico manera a y ta sigui sosode for di dia cu e

gobierno di MEP POR y RED a sinta;

4. Para e plannan di minister di enseñansa pa trece cambionan den e programa di “Tra’i Merdia” y den orario di trabou di maestronan di scol;

5. Para tur nombramento politico den tur departamento di gobierno, den organisacionnan

(semi)gubernamental y den companianan estatal manera RDA, ELMAR y SETAR

inmediatamente;

6. Para tur biahe di ministernan, conseheronan di ministernan, minister plenipotenciario na Den Haag y na Washington inmediatamente, manera MEP POR y RED a priminti Pueblo;

7. Para tur proceso y decision pa reparti of bende partinan esencial di e Refineria Di Aruba

(RDA), MFSA, tereno di e refineria y e actividadnan di transhipment bou di amigo y

sponsornan politico di MEP POR y RED;

8. Para introduccion di tur medida nobo – entre otro esunnan cu IMF ta recomenda (VAT) –

inmediatamente y laga decisionnan riba e tereno di economia, finansa y tur otro tereno di

gobernacion, pa e gobierno nobo cu lo asumi responsabilidad despues di eleccion.

Fin di e manifesto.