Ya caba e contea final a cuminsa core pa e fecha limite cu Minister di Infrastructura, Otmar Oduber a duna di conoce den su maneho pa tur esunnan cu tin un rancho of casita crioyo den area di costa of rif pa bin registra nan, prome cu fin di november na Departamento di Infrastructura y Planificacion (DIP).

Director di DIP, Haime Croes a bin cu mas informacion riba e maneho nobo aki, caminda esun cu ta bay registra y para responsabel di e rancho, mester bin cu un prueba pa haya un precario cu tur e condicionnan, caminda automaticamente bo tin cu paga p’e tambe.

E ta asina cu depende di e grandura di e rancho, e balor ta alrededor di 100 florin pa meter cuadra pa aña. Igualmente nan ta registra persona y no negoshi. Tambe den e maneho nobo aki ta wordo prohibi e extension di e rancho of construccion nobo. “Manera cu e ta ey asina e ta keda,” el a bisa.

Igualmente ta prohibi e uzo di asbest, teniendo cuenta cu e parti di sostenibilidad. E rancho mester ta uno nechi pa Aruba su parti geografico por keda bunita. Otro condicion den e maneho nobo aki ta cu e ranchonan ta pa temporada cortico di vakantie, ya cu e no ta pa biba aden.

Croes a laga sa cu e minister encarga cu Infrastructura, Otmar Oduber kier pa e tradicion di recreacion den e ranchonan continua. Pero a bin cu un maneho pa evita tambe cu e ta bira un sorto di vivienda. E mester keda pa uzo di recreacion, unda mester tene cuenta cu parti di naturalesa. Tambe e maneho aki ta cuadra cu e ROP nobo cu a wordo aproba. Pero den e ROPV cu aworaki ta ringzaken, gobierno ta bay regula uzonan di tereno, specialmente den e areanan di naturalesa.

Ta asina cu a base di e potretnan saca satelitalmente nan ta ripara cu hopi di e ranchonan aki ta den e terenonan destina pa naturalesa. Pa e motibo aki, DIP ta hayando hopi critica, specialmente den e parti di Boca Grandi y parti noordwest di nos isla, ya cu e construccion di rancho ta birando hopi mas grandi.

Den e maneho nobo aki gobierno ta tene cuenta cu e ranchonan of casita crioyo aki cu tin un meta di tradicion cultural, unda hendenan cu no ta bay afo ta kampeer pa disfruta di nan temporada di vakantie. Croes a indica cu nan tin cu tene cuenta tambe cu nan tin cu regula e construccion di mas rancho, considerando cu mayoria di nan a wordo lanta den area destina pa naturalesa. P’esey nan mester bin cu regulacion pa cuida nos medio ambiente y cu e ranchonan aki por cuadra den e idea di sostenibilidad cu nan tambe ta para pe.

Teniendo na cuenta e aspectonan aki, nan a anuncia cu te fin di november gobierno pa medio di DIP ta duna tur hende cu tin un rancho of casita crioyo chens pa bin registra den dos luna. Croes a bisa cu pa fin di november e propietario di e rancho mester registr’e pa despues no bin haya problema cu DIP hunto cu DOW ta bay basha abou esunnan cu no ta registra debidamente.