Containernan di klapchi a wordo entrega na tur bendedo

Desde ayera mainta e temporada di klapchi a inicia. E trucknan a sali for di e deposito di Wela desde 4’or di mainta y a hiba e containernan na nan destino. E biaha aki tabata tin mas di 15 container cu a yega, pero tabata tin algun container di aña pasa cu a resta.

Un biaha mas e comision di klapchi cu ta consisti di Brandweer, Polis, DOW y DTI a yega hunto mainta trempan pa asina coordina y dicidi unda e prome container lo bay. Un total di 4 compania di truck a percura pa hiba e containernan na unda nan mester wordo baha. Segun Bombero Frido Dirksz na Bon Dia Aruba, casi 40 container di klapchi tin,  contando esunnan di aña pasa.

Ayera mainta despues cu e containernan di klapchi a wordo entrega, e bendedonan hunto cu su ayudantenan a cuminsa drecha nan luga. Tin algun bendedo cu a busca container entre dos pa tres persona, y esaki ta pone cu nan mester a percura pa tin un luga di encuentro. Aki tur ta topa y cuminsa baha e cantidadnan cu nan tin cu haya y bay cu e cahanan di klapchi na nan luga.

Nan por cuminsa bende klapchi te ora cu tur cos ta cla. Si e bendedo di klapchi a keda cla ayera, e por cuminsa bende di biaha. Pero mayoria lo ta bendiendo desde awe. Mientras cu hendenan ta pasa mira e prijsnan di klapchi y ta cumpra, e comision di klapchi ta controla y si nan haya algo no ta klop nan ta bisa e bendedo pa drecha esaki. Pa cera un luga, e comision lo tuma e decision hunto y aki ta unda Polis ta cay aden pasobra nan ta encarga pa haci esaki.

Controla luganan di klapchi

Ainda e comision tabata na Wela despues di merdia pasobra nan tabata controlando algun cos. Sr. Dirksz a comenta cu awe e comision lo sali pa asina cuminsa controla tur luga di bende klapchi. Esaki lo dura dos pa tres dia ya cu nan tin diferente caminda pa bay. E miembronan di e comision nan trabou a wordo parti.

Cada un tin cu controla diferente aspecto. Polis lo ta controlando cu tur bendedo di klapchi tin nan permiso na ordo y si esaki no ta asina nan tin e autoridad pa cera e luga. DOW lo bay controla riba e fecha di produccion di e klapchinan, pero tambe nan lo mira cu si e klapchinan ta cumpli cu e rekisitonan di siguridad. E departamento di DTI lo ta controlando riba e coriente di e luganan ta bon y si e luganan ta cumpli cu e rekisitonan. Brandweer ta encarga pa controla cu e luganan tin tur material disponibel pa paga un candela pero tambe rond di e luga di klapchi ta keda limpi.

No mag bende mas

Dia 1 di januari 2016 no mag di bende klapchi mas y tur esunnan cu a resta esaki tin 1 siman di tempo pa entrega nan na Wela. Si e comision di klapchi gara personanan cu

no a entrega e klapchinan, e comision di klapchi lo tuma accion contra nan.

Cumpli cu rekisitonan

Un luga cu a hala atencion di Bon Dia Aruba ta na Tanki Flip. Un di e rekisitonan ta indica e distancia di e luga di klapchi y negoshi of cas. A ripara cu e luga di klapchi ta hopi cerca di un cura y a puntra Brandweer riba esaki. Sr. Ponson di Brandweer a bisa Bon Dia Aruba, cu e luga di klapchi no tin bentana na e banda patras y nan tin tur e materialnan cu Brandweer ta exigi, nan por bende. Pa e comision ta importante cu tur luga di klapchi ta cumpli cu e rekisitonan.

Recordatorio pa ta safe

Ta recorda tur hende cu ta cumpra klapchi, pa cumpra esun cu ta ideal pa cada persona y si ta busca pa mucha pa cumpra esun cu ta bon pa mucha. Tambe ta recorda tur hende pa tin bista riba mucha durante cendemento di klapchi. Pa e bendedonan di klapchi mantene nan area limpi y pa no tin mucha menos cu 16 aña ta bende.

E aña aki no lo bay ti flyer pa recorda riba e siguridad ora ta trata klapchi, pero na e containernan lo tin poster di prohibicion di huma. E aña aki e departamento di salubridad a bin cu poster di hendenan cu a haya accident cu klapchi.