Tin contacto intensivo entre Hulanda y e islanan Aruba, Boneiro y Corsou riba e desaroyonan na Venezuela.
Esaki minister Ronald Plasterk di Asuntonan di Reino a bisa durante su bishita di despedida na Aruba. El a indica cu el a papia durante e bishita aki cu gobierno di Aruba riba e situacion pero no kier duna detaye. Tampoco e kier bisa si Hulanda ta bay yuda e islanan den caso nan haya problema cu opvang di refugiado. Y e minister no kier a bay den detaye riba siguridad, den caso por ehempel si Merca kier interveni.
Unico cos cu e ta bisa ta, cu nan a papia y cu tin un particion di tarea entre e paisnan den Reino. E minister ta splica cu e no kier ta mas specifico como cu ainda mester delibera riba e diferente scenarionan.
E mandatario si ta bisa cu Hulanda ta consciente di e situacion ‘preocupante’ na e ‘pais bisiña mas grandi di Reino’. Di otro banda e problemanan politico y economico tambe tin su efecto negativo riba turismo y inversion Venezolano na e islanan. Esaki ta algo cu na Hulanda nan no ta mucho consciente di dje, e ta splica, y p’esey e ta purba di clarifica esaki den parlamento Hulandes continuamente. Esta cu e islanan tambe ta sinti e efecto cu e cantidad di Venezolanonan cu placa a baha.
