Indice di Prijs di Consumo pa luna di December 2024
E CPI pa luna di December 2024 ta 109.07, loke ta representa un caida di 0.2% compara cu e indice di November 2024 (109.25).
E cambio di e CPI pa e ultimo diesdos (12) luna (December 2023 te cu December 2024) ta 0.3%, un caida di 2.0 punto di porcentahe (ppt) compara cu e periodo corespondiente di aña pasa (2.3%).
E promedio anual (ultimo 24 luna) di e tasa di inflacion pa e periodonan di December 2021 te cu December 2022 y December 2023 te cu December 2024 ta 1.7%, un caida di 1.7 ppt compara cu e 3.4% registra den e periodonan di December 2020 te cu December 2021 y December 2022 te cu December 2023.
Durante e luna aki, cinco (5) di e diesdos (12) sectornan a registra caida di prijs. E caida cu tabatin e mayor efecto riba e CPI a wordo registra pa e sector di “Transporte” (-1.5%), causando un efecto di, -0.19 ppt. E caidanan den e sectornan restante a contribui cu un efecto di -0.19 ppt riba e CPI di December 2024.
E caidanan aki a wordo contraresta parcialmente door di principalmente un subida den e indice di e sector di “Recreacion y cultura” (1.7%) cu a contribui cu un efecto di 0.15 ppt riba e CPI di December 2024. E subidanan den e sectornan restante a contribui cu un efecto di 0.08 ppt riba e CPI di December 2024.
E caida den e sector di “Transporte” a wordo causa door di caidanan di 2.1% y 1.3% den e categorianan “Gasto relaciona cu uso di vehiculo di transporte personal” y “Compra di vehiculo”, causando un efecto di respectivamente, -0.17 y -0.06 ppt. E subida den e sector di “Recreacion y cultura” a wordo causa principalmente door di subidanan den e categorianan “Vacacion” (4.1%) y “Servicio recreacional y cultural” (1.3%), causando un efecto di respectivamente 0.09 y 0.04 ppt.
