Banco Central di Aruba a publica un resultado pa e di prome trimester di 2024, den cual a destaca cu consumidornan tabata mas pesimista, mirando cu e indice di confiansa di consumidor a baha cu 0,7 punto di indice te na 94,3 den e di prome trimester di 2024 (Grafiek 1).
Den e prome trimester di 2024, a pesar di adelanto den actividad turistico, casi tur encuestado (98 porciento) a señala cu nan ta premira cu prijsnan lo ta mas halto den e proximo 6 lunanan (Q4-2023: 90 porciento).
Consumidornan tabata principalmente preocupa cu e situacion di negoshinan y di economia lo deteriora (Q1-2024: 47 porciento, Q4-2023: 41 porciento) y pa haña un trabou nobo ta mas dificil (Q1-2024: 39 porciento, Q4-2023: 34 porciento).
Tanto e indice di e situacion actual como e indice di expectativa a cay, esta cu 0,9 punto di indice te na 94,6 y 0,8 punto di indice te na 94,8, respectivamente, den e di prome trimester di 2024.
E indice di habito di consumidor a baha cu 0,4 punto di indice, esta di 94,9 te na 94,5 den e di prome trimester di 2024.
Informacion adicional riba e encuesta di confiansa di consumidor ta disponibel riba website di CBA (https://www.cbaruba.org/).
Tocante Banco Central di Aruba
E proposito principal di Banco Central di Aruba (BCA) ta pa contribui na stabilidad financiero y e prosperidad economico di comunidad di Aruba. BCA ta logra esaki door di implementa un maneho monetario efectivo dirigi na mantene stabilidad di balor fiho di e florin contra e dollar Mericano, promove e solides y integridad di e sistema financiero y formenta un sistema di pago eficiente y confiabel.
Banda di su tareanan principal, BCA ta encarga cu emision di biyete di florin y moneda di florin y ta e bankero di gobierno di Aruba. Ademas, e ta regula e transaccionnan di pago cu exterior y ta administra e divisanan di Aruba y ta vigila e uzo di esaki.
Pa mas informacion riba Banco Central di Aruba, por bishita nos website www.cbaruba.org
