Segun Banco Central di Aruba su Encuesta di Confiansa di Consumidor mas recien, consumidor tabata mas pesimista, mirando cu e indice di confiansa di consumidor a cay cu 1,2 punto di indice te na 93,0 den e di prome trimester di 2023 (Grafiek 1)[1].

Na final di e di prome trimester, consumidor tabata principalmente preocupa cu (I) e situacion di negoshinan y di economia lo deteriora (Q1-2023: 51 porciento, Q4-2022: 54 porciento), (II) tin dificultad pa haya un trabao nobo (Q1-2023:44 porciento, Q4-2022: 38 porciento), y (III) e posicion financiero di gobierno lo empeora (Q1-2023: 43 porciento, Q4-2022: 35 porciento).

Ademas 33 porciento di tur encuestado ta anticipa cu e situacion financiero na cas lo empeora den e di prome trimester di 2023, esta 15 punto di porcentahe menos compara cu e trimester anterior (Q4-2022: 45 porciento). Aproximadamente 91 porciento di tur encuestado a señala cu nan ta premira cu prijsnan lo ta mas halto den e proximo 6 lunanan (Q4-2022: 92 porciento).

Tanto e indice di e situacion actual como e indice di expectativa a baha, esta cu 0,8 punto di indice te na 93,4 y 0,1 punto di índice te na 93,9, respectivamente, den e di prome trimester di 2023.

E cantidad di encuestado cu a raporta cu baymento di vakantie no tabata conveniente, a subi te na 57 porciento (Q4-2022: 36 porciento), mientras 56 porciento di e encuestadonan a señala cu compra di un aparato grandi no ta adecua (Q4-2022: 41 porciento).

Pa locual ta haci un prestamo, 68 porciento di encuestado a indica cu esaki no tabata adecua (Q4-2022: 60 porciento). Ademas 65 porciento di encuestado a raporta cu tuma un hipoteca no tabata adecua (Q4-2022: 58 porciento), mientras cu 73 porciento di encuestado a señala cu compra di un auto no tabata conveniente (Q4-2022: 65 porciento). Consecuentemente, e indice di habito di consumidor a baha di 95,1 den e di cuater trimester di 2022 te na 92,5 den e di prome trimester di 2023.

  1. E indice por varia entre 90 y 110. Entre 90 y 100, e indice ta mustra un situacion di pesimismo. Un indice di exactamente 100 ta indica cu consumidornan no ta ni optimista, tampoco pesimista, pero ta neutral den nan pensamento di desaroyo economico na Aruba. Entre 100 y 110, e indice ta mustra un situacion di optimismo den pensamento di consumidornan. ↑