(AP) – Un consultante politico cu a manda yamadanan genera pa inteligencia artificial cu ta imita bos di President Joe Biden na votadornan prome cu New Hampshire su primario presidencial ta enfrenta un boet di 6 miyon dollar y mas di dos decena di acusacion criminal.
Federal Communications Commission a bisa cu e boet cu a propone diahuebs pa Steven Kramer ta e prome cu ta involucra tecnologia di inteligencia artificial. E compania cu ta acusa di a transmiti e yamadanan, Lingo Telecom, ta enfrenta un boet di 2 miyon dollar, aunke den ambos caso e partidonan por yega un areglo of negocia mas segun FCC.
Kramer a admiti cu e la orkestra e mensahe cu a ser manda na miles di votador dos dia prome cu e prome primario den e nacion dia 23 di januari. E mensahe ta reproduci un bos genera pa inteligencia artificial similar na e President actual y ta usa su frase “What a bunch of malarkey” y ta sugeri falsamente cu vota den e primario por afecta votacion den november.
Kramer ta enfrentando 13 acusacion cu ta acusa cu e ta den violacion di New Hampshire su ley contra intento di prveni cu un persona lo vota usando informacion cu ta duna e impresion incorecto. Tambe e ta enfrenta 13 acusacion di crimen menor unda ta acusa su persona di falsamente representa su mes como un candidato cu su propio conducta of esun di otro persona. E acusacionnan a ser otorga den 4 sitio y e lo ser procesa pa e estado su procurador general.
Procurador General John Formella a bisa cu New Hampshire ta comprometi pa sigura cu su eleccionnan “lo permanece liber di interferencia ilegal.”
“Mi ta contento di mira cu nos partnernan federal ta comprometi di mesun manera na proteha e consumidornan y votadornan for di yamadanan robotico dañino cu ta stroba nan libertad di vota,” Formella a bisa, ken a keda designa pa gobernador Republicano, Chris Sununu.
Lingo Telecom a bisa cu ta den desacuerdo cu FCC su accion, cual el a yama un intento di purba impone reglanan nobo di manera retroactivo.
“Lingo Telecom ta tuma su obligacionnan regulatorio extremadamente na serio y a coopera completamente cu agencianan federal y di estado pa asisti den identifica e partidonan responsabel pa e campaña aki,” e compania a bisa. “Lingo Telecom no tabata involucra di ningun manera den e produccion di e yamadanan aki y e accionnan cu el a tuma a cumpli cu tur regulacion y standard di e industria aplicabel.”
