Nos redaccion a tuma nota di un post riba e medio social Facebook di un dama cu ta ofreciendo consultanan na personanan cu mester papia of guiansa den nan bida. E ta bisa cu psicologonan ta hopi caro, nan costonan no ta wordo cubri por medio di Azv anto ta hopi hende mester di esaki na Aruba.

El a haya basta critica pero tambe hopi interes den locual el a trece pa dilanti. Den cuadro cu nos publicacionnan anterior tocante e tema di psicologia y salud mental, nos a acerca e dama, Sahirra Vishnudatt, pa e por elabora cu nos riba su perspectiva y servicionan.

Sra. Vishnudatt ta un ciudadano di Aruba cu ta ofreciendo consultanan na hendenan cu segun e djis mester un persona pa scucha nan, papia riba decisionnan, relacionnan, trabao, perdidanan y otro asuntonan social. E ta un hende cu a studia Hospitality Management y haci diferente cosnan den management. “Pero semper mi curason tabata ta unda mi por haci un diferencia den e parti social y no necesariamente como un trahado social, psicologo of psikiatra pasobra mi ta kere cu na Aruba toch tin un manera pa por evita pa un hende yega asina leu,” sra. Vishnudatt ta bisa.

E ta subraya cu e ayudo ta dificil pa haya, e no ta wordo cubri y ta mucho caro. “Ora un persona ta admiti cu e mester ayudo y bay busca ayudo, e ta haya 45 minuut unda e mester paga 175 florin por ehempel. No ta tur hende por paga esey pues kico un persona asina ta bay haci?” Sra. Vishnudatt a wordo ataca riba Facebook door di algun psicologo y trahadonan social pasobra e no ta un profesional den e ramo aki, pero nunca el a bisa cu e kier tuma nan luga segun e ta splica.

‘Support groups’
Sra. Vishnudatt ta bisa cu mescos tin support groups manera Alcoholics Anonymous, no mester den e caso ey un psicologo si e persona no a yega emocionalmente of mentalmente asina leu ainda. Por sinta den grupo di hende cu no ta bay husga bo anto combersa. “Na Mariniers Kazerne por ehempel tin un psicologo cu ta trata cu PTSS (Post Traumatic Stress Syndrome.) Tin hopi hende na Aruba cu tambe a bay Iraq y Afghanistan y con ta haci cu e hendenan aki por ehempel?

E ta algo specifico unda cu por ehempel e psicologo ta papia cu ne pasobra e tambe tabata eyfo riba e field.” Instancianan manera Asuntonan Social of Bureau Sostenemi segun sra. Vishnudatt ta hopi lihe pa duna un evaluacion si un mucha tin ADHD of cualkier otro cos por ehempel. Vishnudatt: “Pero ken boso ta y a base di kico ta haci evaluacion? Finalmente ami ta bisa pa kico lag’e yega asina leu si solamente papiando mes bo por yega na solucion. Bo no mester mas cu un sentido comun, un bon curason y bon horeanan pa scucha hende. Mi no ta bay prescribi bo nada pasobra ami no ta studia pa haci e diagnostico ey. Pero dicon mi no por scucha bo y bisa bo pa wak e glas mita yen enbes di mita bashi?”

Taboo grandi na Aruba
Sra. Vishnudatt ta bisa cu ora el a bin bek for di Hulanda el a realisa cu tin un taboo grandi na Aruba unda tin hendenan cu no tin caminda di bay cu tur e abuso cu ta sosode. “Un muhe cu a wordo maltrata mester un psikiatra, un psicologo y slachtofferhulp. E mester por papia, yora y grita anto unda bo ta bay pa esey? Esey ta e cos cu mi ta bisa cu mi kier haci un diferencia unda cu awor mi a cuminsa cu esaki y otro hende por continua cu ne y haci hopi mas den dies aña di tempo cu esaki pa e ta realmente efectivo,” e ta bisa. El a sigui expresa cu e no ta trata di placa pero claro e mester wordo paga pa su tempo. Pero e no ta bay duna bo un diagnosis medico manera menciona pasobra e djis no por haci esey.

E ta trata cu na momento cu bo ta sinti bo malo y kier papia cu un hende pa por haci esey na luga di bay tira bo curpa na Boca Mahos, segun e ta bisa nos. “Pakico nos no por purba evita e cosnan aki unda cu mayornan por ehempel ta baha rabia riba nan yiunan, of bo a perde trabao y bo kier bay eynan haci un escandalo. Hende mester tey eynan pa guia bo na e momentonan ey y mester por compronde bo emocion,” e ta bisa.

E hendenan cu sra. Vishnudatt a consulta te ainda el a haya como comentario cu el a kies un carera robes pasobra ta esaki e mester ta haciendo pa basta tempo. Sra. Vishnudatt ta bisa Bon Dia cu seguramente e lo bay pa un opleiding den e ramo aki pa asina expande tambe riba e yudansa cu e kier brinda. Sra. Vishnudatt actualmente ta brinda consultanan priva y prome cu cuminsa cu e sessions e ta haci un intake na un caminda publico cu e persona pa wak si e por trata cu ne.

Pasobra si naturalmente e ta un persona cu tin mester di algo mas manera un psicologo of psikiatra, e no ta apto pa por trata cu nan y lo guia nan debidamente na e caminda cu nan tin cu cana.

Bon Dia lo sigui amplia mas riba e tema aki cu instancianan y expertonan concerni den siguiente publicacionnan.