Dia 4 y 5 di december ultimo, a tuma luga e dialogo di Consulta di Structura di Tarifa di Awa organisa pa WEB Aruba. E sesionnan a sirbi como un plataforma di dialogo habri y constructivo caminda cu a discuti e structura di tarifa di awa na Aruba.
Presente na e charla y maintanan di informacion tabata minister di Educacion y Deporte, Endy Croes, como tambe representantenan di accionista, representante social, gremionan comercial y sindical, asociacion di sector hotelero, sector di cuido, sector di naturalesa y agricultura, instituto – y scolnan.
E sesionnan a conta cu presencia di e orador internacional Sra. Marga Buys-Trimp cu a presenta e topico “Water Tariff Structure Consultation” unda a trata, entre otro, e suministro di awa na Aruba, e condicionnan general, gasto, a compara e tarifa di awa den region, a presenta diferente opcion pa structura di tarifa di awa y na final tabatin oportunidad pa haci pregunta y/of duna sugerencia. Minister Croes a remarca den un comunicado di prensa cu e tarifa di awa na Aruba ta mas abao cu Corsou.
Tarifa residencial na Aruba:
0-6 m3 5.75
7-12 m3 7.90
13-20 m3 14.20
20+ m3 19.20
Tarifa residencial na Corsou:
0-9 m3 9.27
9-12 m3 14.42
12-20 m3 16.36
20 + m3 18.33
Tambe, a resalta cu e tarifa di awa comercial y industrial na Aruba ta mas abao cu di Corsou. Na Aruba e tarifa di awa comercial y industrial ta 12.00 y na Corsou esaki ta 14.79. Adicionalmente, e tarifa special pa agricultura, horticultura y ganaderia na Aruba ta 5.50 y na Corsou e tarifa special pa hospital y industria di exportacion ta 13.84. A base di tur informacion, recomendacion y sugerencia ricibi durante e sesionnan aki, lo delinea e siguiente pasonan pa loke ta trata e structura di tarifa di awa na Aruba.
Concluyendo, Minister Endy Croes ta gradici minister encarga cu energia Sr. Glenbert Croes, Utilities Aruba y WEB Aruba N.V. cu e iniciativa aki, unda a involucra tur stakeholders den e proceso cu ta di vital importancia pa asina haya un bista mas amplio di tur e aspectonan relaciona cu e consumo y tarifa di awa.
