Mientras consuladonan Venezolano rond mundo ta desafiando retonan financiero grandi, parce cu na Aruba e situacion no ta mucho diferente. Si esaki lo ta relaciona cu hisamento di gastonan pa renoba paspoort Venezolano no ta conoci ainda.

Manera fuente Associated Press (AP) a raporta luna pasa caba, gobierno di Venezuela tin problema pa paga huur na edificio, unda Consulado di Venezuela na Miami ta situa. Esaki no ta algo cu solamente lo por afecta e consulado particular aki, mirando cu nan a indica cu fin di aña pasa, ministerio di relacionnan exterior a duna ordo pa consuladonan rond mundo mara faha y negocia huur di nobo, den un nota di e ministerio cu AP a haya.

E situacion aki parce cu ta afecta e consulado di Venezuela na nos pais tambe. Pa algun siman varios fuente ta indicando cu lo tin problema di parti di gobierno di Venezuela pa paga huur na e consulado situa otro banda di edificio di Dimas. Pero actualmente nos a ricibi un tip di un fuente cercano na e huurdonan cu ta bisa cu e consulado ta 5 luna atrasa den nan pagonan pa e edificio. E situacion ta bay asina leu cu actualmente nan a haya nan mes forsa pa cera e di dos piso di e edificio unda e consulado su instituto tabata situa, segun e fuente ta conta nos. Aki nan tabata duna diferente tipo di les.

Salario di funcionario

Pero e situacion no ta toca solamente e edificionan, si no tin indicacionnan cu funcionarionan no ta hayando pago. Ta asina cu Associated Press a indica tambe cu consulnan rond mundo di e gobierno Venezolano ta keha di manera priva cu nan no ta haya pago pa algun luna. Reflehando na e situacion na Aruba, fuentenan confiabel ta indica cu varios funcionario diplomatico na Aruba tin algun luna sin pago di salario. Te ainda nos no a haya niun comentario di parti di e consulado riba esaki.

Manera nos ta bin ta publicando pa ultimo simannan, e prijs pa renoba un paspoort Venezolano a subi considerablemente, di 80 dollar pa 280 dollar den ultimo aña. Un persona cu a keda afecta pa e medida a bin dilanti, esta Laura Vives, kende a cuestiona si esaki ta un decision cu a keda tuma pa ministerio di relacionnan exterior of si ta consulado di Aruba a dicidi di haci esaki.

Den nos entrevista cu sra. Vives, e tabata kier haya sa dicon mester exigi un pago asina exagera, si esaki lo ta relaciona cu e escasez di material pa traha paspoort of si e consulado no ta haya suficiente placa via e canalnan gubernamental pa asina por opera.

Aunke e consulado na Miami tabata cera desde 2012, nan a sigui paga e huur riba e edificio, te augustus ultimo. E situacion na Miami a yega asina leu cu e doño di e edificio den vecindario di Brickell, a lanta un caso contra gobierno di Venezuela pa exigi pago, si no ta saca nan di e luga.

Te ainda nos no ta logrando haya reaccion di e consulado riba e asunto aki, pero nos lo keda informa con e storia ta desaroya manera nos ta bin ta haciendo.