Consulado Mericano na Corsou a emiti un ‘mensahe di siguridad’ pa ciudadanonan Mericano riba e islanan, indicando cu nan ta prohibi personal di consulado temporalmente pa bula cu avionnan di InselAir.

E motibo di cu tabatin diferente incidente concerni e siguridad di e avionnan. E consulado mes ta papia specificamente di dos incidente recientemente. Uno cu a pasa riba 27 di december 2016 unda e avion mester baha na Colombia pa motibo cu problema di presion di aire den e cabina. E otro incidente a tuma luga un par di siman despues riba 13 di januari, unda e avion rumbo pa Miami mester baha cu emergencia pasobra no tabatin presion di aire. E consulado Mericano tambe ta menciona cu den e ultimo seis luna tabatin 4 otro vuelo unda tabatin problema cu presion di aire sea electricidad. Pa motibo di esaki e ora nan a dicidi cu lo prohibi nan personal di bula cu Insel te ora e ‘siguridad di e aerolinea ta drecha’.

Departamento di Aviacion Civil di Aruba ta informa cu ainda tin 6 avion registra na nos pais, ‘grounded’ pa motibo di problema cu siguridad. Desde siman pasa na autoridadnan na Aruba y Corsou a dicidi cu mayoria di avionnan di InselAir no mag di bula mas pa motibo di siguridad. Insel di Aruba a manda un relato indicando cu ta trata 4 di 8 avion na Aruba cu segun nan ta na tera pa motibo di un inspeccion normal (routine). Sinembargo ayera esey no ta mustra e caso cu e informacion di e autoridad Arubano.

Pasahero rabia
Desde siman pasa tin ciennan di hende a keda pega riba e diferente islanan pa motibo cu e vuelonan a cay afo. Ainda tin pasaheronan pega. Ayera pasaheronan na aeropuerto di Corsou a rabia asina tanto cu nan a hasta kibra muebla. Polis mester a bin pa calma e situacion y a detene un persona.

Falta di siguridad ta conoci
Segun nos partner den noticia Ret Karibense, un fuente for di e InselAir mes ta bisa cu e problema di siguridad ta conoci interno. E ta papia di un situacion unda aparatonan no ta calibra cual ta nifica cu e mecaniconan trahando riba e mantencion di e avionnan no sa entre otro si un ‘schroef ta pega of no’. Tambe ta falta material basico manera wiel y azeta. Y e autoridad internacional cu ta controla siguridad di avionnan, a pospone un audit di Insel pa motibo cu nan a constata iregularidad y asina duna e departamento di mantencion di e aerolinea mas tempo pa drecha.