Algun tempo pasa, ora cu di sorpresa Hulanda a yega na un acuerdo pa habri comunicacion aereo y via lama cu Venezuela atrobe, a surgi e asunto di e candidato di Venezuela pa bira consul na Aruba, Carlos Mata Figueroa, ex militar y ex gobernador di estado Nueva Esparta, pero na prome luga miembro prominente di e movimento dictatorial cu tin e pais den un gara mortal, si no bin un cambio.
Na e momento ey, luna pasa, Hulanda no tabata kier ni confirma ni desmenti cu a yega na un acuerdo tocante e persona aki, cu no tin exactamente e background pa bira consul. Nos ta menos cu un luna mas leu, y awor si a bin e confirmacion cu e persona aki, cu ta pertenece na e circulonan di confiansa di presidente Nicolas Maduro, lo ta e proximo consul.
E editorial aki lo no ta dedica na trece argumento dilanti pakico e no mester bin. Hulanda ta dicidi, ora bin problema e ta nan asunto tambe. Pero, e presencia di un persona asina, cu experiencia den maneha informacion confidencial, no por ta un problema directo pa e paisanonan cu ta residencia aki y ta conoci, o menos conoci, como anti-Chavista? Y con ta para cu esunnan di aki mes, cu ta lanta nan voz contra e tragedia cu e regimen aki ta ocasionando na e pais bisiña?
Sinceramente, nos no ta kere cu e regimen ta bay cuminsa cu vigila su ciudadanonan e aña aki; nan tin hopi aña ta haci esey caba. Por ta cu e experiencia di e consul nobo por duna extra apoyo na esey, pero nos mester tuma como realidad cu e tipo di regimen aki, y lamentablemente e continente aki a mira demasiado di nan caba, ta custumbra recolecta afanosamente informacion tocante tur hende cu nan ta mira como contrincante, o pio, enemigo. Esey no ta bay cambia anto.
Pero pakico anto e persona controversial aki? E contesta ta talbes cu nos mester siña mira e cos di nan banda. Importante no ta cu e persona tabata gobernador; importante ta cu e ta militar. Segun cu cos ta birando mas dificil na Venezuela, nos por observa e intento di acapara gran parti di e puestonan clave den gobernacion bao mando directo di esunnan cu ta di absoluto confiansa, y eseynan ta e militarnan cu ta comprometi cu e proyecto politico cu tin e pais den su gara. Nos ta mirando esey den sectornan manera petroleo y gas, y mineria di oro y otro producto minero di interes.
Tambe nos ta mira esey den e cadena di importacion di cuminda y medicamento, unda militarnan corupto ta bira multimiyonario riba custia di nan compatriotanan. Algun aña pasa caba a yega asina leu caba cu a crea un empresa petrolero bao mando militar directo, pa den caso cu ta necesario tuma over henter PDVSA y su subsidiarionan. Y recientemente a pasa pa otro version di esaki, unda a pone un militar na cabes di e empresa clave, di cual henter e pais ta depende pa gana divisa. Con esey ta bayendo tambe nos por lesa tur siman: no a bin un paro na e caida liber den cual e empresa ta, tur luna ta produci menos. Esaki ta mas importante cu henter e proyecto electoral di e dictador. Ken cu gana eleccion, cu oposicion ta participa si of no, ta casi irelevante na e momento aki.
Loke ta parce mas relevante ta, con pa garantisa, te unda por, un control hermetico riba e poblacion, di esunnan cu tin berdadero poder na Venezuela. Esey no ta solamente e cupula politico reuni den e partido Chavista PSUV, pero mas importante ainda e cupula di poder militar na cual Mata Figueroa ta pertenece.
Ironicamente, America Latino, despues di deshaci di tur e dictaduranan militar cu a haci desaster den nan pais, te un dia nan a comprende cu nan no por goberna, awor ta testigo di e regreso na poder di un caste nobo di multimiyonario di coronel y general, cu den e añanan reciente a haya e oportunidad pa horta, pero horta na grandi. Naturalmente, mescos cu e dia a yega cu e Videla, e Pinochet, e Rios Monttnan di e mundo aki mester a traha luga pa otro, e situacion na Venezuela ta incontenibel, ni cu un aparato militar cu ta 10 biaha mas grandi cu esun actual. Hamber ya no ta e privilegio di e pobernan, el a yega hasta na e cuartelnan di polis y militar.
Venezuela ta den un fase caba cu ta defini pa desesperacion. Desesperacion di gran parti di poblacion cu no sa mas di unda saca placa pa por come. E hperinflacion ta bay acelera den e lunanan nos dilanti haciendo e situacion mas grave ainda. Desesperacion ta cuminda diario tambe pa esunnan cu sa cu nan dianan ta conta, si nan no mantene nan mes na poder. Manera nos por a mira tanto biaha den historia, esaki ta e desesperacion mas nocivo y mas dañino cu por existi.
Pues e consul militar, o militar consul, no a bin pa motibo relaciona cu nos. El a bin den cuadro di e expansion di gara militar riba nan asuntonan.
