ORANJESTAD – Dia 27 di februari ultimo e comunidad Dominicano a celebra e di 175 aniversario di independencia di nan pais. Pa duna contenido na nan fecha nacional y historico aki, Consulado di Republica Dominicana y Fundacion Dominicana Arubanse Juan Pablo Duarte a organisa un evento social cultural na Riu Hotel.
Esaki ta e delaster evento di dia di independencia di Republica Dominicano cu e consul Dominicano, Alfredo Mateo Zabala ta atende como diplomatico di su pais na Aruba. Canciyeria di Republica Dominicana a informa recientemente cu e presidente di nan pais, Danilo Meja, a nombra un consul Dominicano nobo na Aruba pa medio di e decreto 75-19. E mandatario a nombra na Victor Marcelino Comprés Rosario, como consul di su pais na Aruba pa reemplasa e consul actual sr. Zabala.
E evento social cultural Dominicano tabata bon atendi. El a conta cu asistencia di minister Armando Lampe y minister Glembert Croes. Igualmente tabata presente e consul di Haiti, tambe representantenan di fundacion Fiesta Patria, Asociacion Amigos de Colombia, y comunidad en general y muy specialmente comunidad Dominicano.
