A transcuri un periodo largo prome cu consul nobo di Venezuela na Aruba, Carlos Mata Figueroa, por a ricibi su credencial diplomatico for di Hulanda.
Unabes cu esaki a sosode tambe a transcuri varios siman prome cu sr. Mata Figueroa bin Aruba. Esaki finalmente a sosode durante fin di siman ultimo, unda el a asumi su funcion diplomatico riba nos isla.
E yegada di sr. Mata Figueroa kende tabata militar y minister di Defensa Venezolano, a wordo produci despues cu prome minister di Aruba, Evelyn Wever-Croes a reuni cu varios mandatario na Hulanda siman pasa. Tambe el a reuni cu minister di Relacion Exterior, Stef Blok, caminda nan a papia tocante e situacion di e embargo di Venezuela. E impasse aki a wordo resolvi y manera e matutino aki a informa, dia diahuebs awor lo habri e frontera maritimo entre Aruba y Venezuela cu lo facilita importacion di fruta y berdura for di e pais bisiña ey.
E nombramento di e consul nobo di Venezuela a trece algun reaccion cun’e. Pero informacion cu Bon Dia Aruba a yega di publica ta indica cu no tin ningun caso habri na Merca contra sr. Mata Figueroa riba traficacion di droga. E echo aki a haci cu despues di un screening, Hulanda a duna luz berde pa e consul Venezolano lo por bin eherce su funcion na Aruba.
E diplomatico tin un tarea pisa pa reestablece e confiansa den e relacion bilateral aki cu a pasa den un crisis, despues cu e gobierno di presidente Nicolas Maduro a dicidi di impone un embargo unilateral riba Aruba y otro islanan di reino Hulandes.
