Pa medio di e decreto 2341 di dia 17 di december ultimo di Ministerio di Relacion Exterior di Colombia, ya ta conoci e nomber di e consul nobo di Colombia.
Ta trata di Francisca Rodriguez Romero kende lo asumi e funcion di Minister Plenipotenciario for di Ministerio di Relacion Exterior di Colombia anexa na e Consulado di Colombia na Aruba. Rodriguez Romero ta un diplomatico di carera y funcionario consular di canciyeria di Colombia, kiermen e no ta un nombramento politico.
Ya caba Bon Dia Aruba a yega di informa recientemente cu e consul di Colombia na Aruba, Mirza Gnecco no lo sigui mas den su funcion diplomatico. Dia 2 di januari venidero, Gnecco lo cumpli 6 aña como consul di e comunidad mas grandi di stranhero riba nos isla. Como funcionario diplomatico den exterior, nan ta bin cu un periodo defini cu nan sa di antemano prome cu nan ta asumi e funcion aki.
Consul Gnecco lo wordo reemplasa pa su colega di carera diplomatico, Rodriguez Romero. Ainda ta tuma un par di siman prome cu e Consul nobo lo cuminsa eherce su funcion nobo. E mester ricibi su credencial como consul for di reino Hulandes. Tanten Nelson Soto Cardozo kende ta funcionario di e ministerio di Relacion Exterior di Colombia y kende recientemente a yega Aruba, lo ta encarga di e consulado.
Tambe e diplomatico Gnecco a ricibi e decreto di su gobierno caminda for di 5 di februari proximo, e lo mester asumi un funcion y responsabilidad nobo den Canciyeria Colombiano. E ta un funcionario di carera diplomatico; y e ta regresa na su cas na Bogota, Colombia.
Durante un entrevista cu e matutino aki, Consul Gnecco di Colombia a probecha e oportunidad aki pa expresa su gradicimento na Aruba su pueblo, y muy specialmente na nos autoridadnan local. El a bisa cu su principal mensahe di despedida ta di ‘danki’.
