ORANJESTAD – For di februari ultimo, Sra. Francia Rodriguez, ta e consul nobo di Colombia na Aruba pa 3 aña. E persona cu ta representa oficialmente e comunidad di migrante mas grandi estableci den e isla aki a nace na Bogota. E ta casa cu un Ruso, mama di un mucha muhe di 13 aña, abogado di profesion y e tin algo mas cu 20 aña como funcionario di carera diplomatico den e ministerio di relacion exterior di Colombia.

El a yega di realisa diferente funcion, entre nan consul di su pais na Austria, y 13 pais mas bisiña, entre nan e paisnan Balcatico. Na aña 2017 el a bay Spaña, unda el permanece den e sede consular di Colombia na Sevilla, pa mas un aña. Despues Sra. Rodrigez a haya e proposicion pa representa su pais ya sea den e consulado di Peru, Ecuador y/of Aruba, y el a kies nos isla pa su trankilidad, beyesa y calidad di bida. “Semper mi tin e pensamento cu Aruba ta un di e miho sitionan cu un bon calidad di bida,” el a declara na Bon Dia Aruba. Tambe Aruba ta un isla situa cerca di Colombia.

Esaki ta e prome biaha cu el a conoce nos isla, unda e ta den proceso di adaptacion. Sinembargo, un aspecto cu e ta considera positivo ta cu e proceso di adaptacion aki ta uno mas facil cu ora el a bay establece 4 aña na Vienna, unda el y su famia a tarda casi un aña pa adapta su mes.

Semper el a yega di scucha di Aruba su bon nomber den mundo di turismo, ya cu pa hopi aña e ta un destino masha gusta pa e Colombianonan. Pero principalmente pasobra Aruba su hende ta amabel y masha habri. “Tin un trankilidad absoluto cu di e banda humano y personal, e adaptacion aki no a nifica pa mi un impacto grandi.” Tambe e consulado di Colombia ta conta cu un bon team di personal.

Unabes cu el a yega Aruba a confronta e calamidad familiar cu su mama a bira malo y despues a fayece, loke no a duna oportunidad pa presenta su mes dilanti su comunidad. E biaha aki haciendo uzo di e medio periodistico aki, su mensahe pa henter comunidad di Aruba, y muy specialmente pa e comunidad di Colombia ta, cu e consulado aki ta habri pa brinda nan e miho servicio cu nan ta ofrece como consulado, y pa representa debidamente nan comunidad. “E consulado ta Colombia y nan tin e portanan habri akinan.”

Rodriguez ta informa nan compatriotanan cu actualmente e consulado ta conta cu e servicio di asistencia huridico totalmente gratis pa medio di e buffet di abogado, mr. Anthony Ruiz. E servicio aki ta wordo ofreci pa medio di cita realisa via e website di e consulado (https://oranjestad.consulado.gov.co).

E consulta huridico ta wordo programa e di dos diahuebs di cada luna for di 2or atardi. E luna aki esaki lo tuma luga riba dia 25 april proximo debi na Semana Santa. E orario lo ta 2or atardi, un total di 8 persona lo wordo atendi. E diplomatico a laga sa cu e servicio aki ta simplemente pa brinda consulta, conseho of guia huridico so pa esunnan cu tin mester di dje. Nan por consulta cu e abogado temanan personal, familiar, migratorio tocante permiso y nacionalidad, etc. El a aclaria cu e abogado t’ey pa consulta huridico so y no pa representa nan den corte, etc.

El a laga sa cu e consulado ta dispuesto pa brinda un bon servicio na nan conciudadano, pero logicamente denter di nan posibilidad. Rodriguez ta consciente cu e comunidad Colombiano na Aruba ta na haltura cu e consulado tin su limitacion tambe.

Un di nan tin di haber cu Canciyeria di Colombia no tin presupuesta placa pa ayudo economico pa cualkier calamidad of necesidad. Igualmente, a pesar cu nan ta consciente cu e prijs di un paspoort of otro documento ta uno costoso den exterior, nan no por haci excepcion riba pago di documentonan of tramite via e consulado aki. E presupuesto cu nan ta maneha tin di haber exclusivamente cu nan funcionamento y promocion di e comunidad Colombiano pa medio di eventonan, entre nan pa e muchanan durante temporada di Pasco.