Awe comunidad Peruano na Aruba ta conmemora e di 199 aniversario di independencia di nan pais natal. Consul di Peru na Aruba, Giovana Guzman de Tapias ta representa un comunidad di alrededor di 1.400 Peruano estableci riba nos isla.

Na ocasion cu e fecha patria aki, e diplomatico a referi na Bon Dia Aruba cu desde 1821, e fecha di 28 di juli a wordo inclui den e kalender patriotico di Peru. E tabata e dia cu Peru su declaracion di independencia a wordo proclama pa General Jose de San Martin. Pero tambe el a referi na e forsanan libertador di Antonio Jose de Sucre y Simon Bolivar, a conduci na e independencia politico y nacemento di e Republica Peruano como estado liber y independiente.

Cada 28 di juli, el a bisa cu tur nan compatriotanan ta bisti di gala pa rindi homenahe pa nan heroenan y martirnan cu a ofrece nan bida pa nan por tin un patria liber awendia. El a gradici e fundacion Fiestas Patrias Peruanos en Aruba cu a organisa un Santo Sacrificio di Misa pa recorda e victimanan di e coronavirus na Peru. Na nomber di Canciyeria y tambe di e Consulado, el a expresa su palabra di condolencia na e famianan cu a perde nan ser keri pa causa di e pandemia aki.

Tambe den cuadro di nan dia nacional, el a expresa palabra no solamente riba e acontecimento historico aki, sino riba Peru su aspectonan politico, economico y social. Sin laga un banda e problema grandi di sanidad cu no solo Peru, sino mundo henter ta confronta debi na e pandemia. Den su mensahe el a bisa cu tanto gobierno di Peru como su presidente, Martin Vizcarra ta atendiendo e problema aki cu “eficacia.”

Igualmente el a laga sa cu for di Aruba nan por a logra dos vuelo di repatriacion. E prome vuelo tabata pa e Peruanonan cu a bin di turismo y nan a keda pega na Aruba. Pa atende cu e situacion aki, te hasta canciyeria a destina un presupuesto pa yuda nan compatriotanan cu a keda pega den cualkier pais di mundo, entre nan Aruba, pa cubri nan gastonan personal. E di dos tabata un vuelo organisa hunto cu embahada di Hulanda na Peru. Igualmente e diplomatico a informa cu e gobierno di Aruba a bin cu un website caminda e Peruanonan cu kier bay nan pais bek, por inscribi den dje.

Na final, Consul Guzman de Tapias a pidi e comunidad Peruano na Aruba pa mantene vigente nan ideal di patria pa medio di nan solidaridad humano. “Extendiendo nuestra mano generosa a quien lo requiera,” el a bisa.