Den e entrevista cu Bon Dia Aruba a realisa cu Consul General di Merca, Margy Bond durante su bishita na Aruba, a toca diferente aspecto di e tema di educacion na Aruba, pero un tema cu tambe a bin dilanti ta e situacion di Venezuela y e diferente efecto di esaki riba Aruba.

Tocante e situacion di narcotrafico via e pais aki, specialmente riba peninsula di Paraguana, cual ta cerca di Aruba, y Corsou, a puntra e Consul General kico ta e situacion actual di colaboracion entre ex-guerrilla Colombiano y gobierno di Maduro, y ki relevancia esaki tin pa Aruba.

 

Consul General Bond a splica kico nan ta haci pa yuda alivia e situacion aki. El a indica cu nan tin un enfoke fuerte pa contraresta trafico ilicito den tur su formanan, cual ta un di e prioridadnan principal di e Consulado Mericano. Esaki, el a señala, ta inclui trafico di droga, trafico di arma y trafico humano.

“Esaki ta un di nos prioridadnan principal. Nos tin un partnership increible cu KPC, cu KPA, cu e oficinanan di Ministerio Publico, cu Ministerionan di Husticia, cu Marina y Wardacosta Hulandes y cu Wardacosta local. Nos tin un presencia di Drug Enforcement Administration (DEA), na Corsou y nan ta lidera e cooperacion cu nos ta haci pa intercepta, pa identifica unda tin barconan sospechoso cu ta trafica articulonan ilicito, y pa conduci operacionnan di intercepcion, y despues finalmente pa persigui e casonan aki,” el a remarca.

El a resalta cu aunke e no tabatin e stadisticanan preciso di e intercepcionnan aki, el a subraya cu tin un registro di cantidadnan grandi di captura durante e ultimo aña.

Consul General Bond a indica cu nan ta trahando ariba algun casonan grandi y di e casonan aki algun di nan ta wordo trata na Merca, na unda e pruebanan ta wordo captura y manda pa Merca, y despues nan ta traha un caso na Merca. Y tin otro casonan cu ta wordo trata aki localmente.

“E ta un area critico pa contraresta trafico di droga y un localidad geostrategico masha importante pa esey, y nos tin hopi exito,” el a señala.

Manera ta conoci e situacion di represion na Venezuela ta birando mas grave, lagando poco speransa pa eleccion liber. Un situacion di continuacion di e dictadura por causa otro ola di refugiado cu por afecta Aruba seriamente. Bon Dia Aruba a puntra e Consul General con nan ta mira esaki.

El a indica cu Merca tambe a mira cifranan record di migrante Venezolano den e ultimo añanan. El a splica cu e ta un asunto compleho y ta un asunto cu ta rekeri tur hende den e region, incluso nacionnan den Caribe y paisnan bisiña di Venezuela, y naturalmente Merca y Hulanda, pa sigui aplica presion y trata di presiona Maduro y su regimen pa tene eleccionnan presidencial liber y husto na 2024.

Consul General Bond a menciona tambe e acuerdo di Barbados, cual a wordo firma na october aña pasa y cu tabata mustra bastante prometedor, pero lamentablemente e regimen di Maduro no ta cumpliendo cu hopi parti di e acuerdo ey.

El a referi na e inhabilitacion di Maria Corina Machado, y otronan, pa participa den e eleccionnan presidencial di e aña aki y ademas di esaki Merca tabatin un serie di rekisitonan cu nan tabata kier pa Venezuela cumpli pa crea un caminda pa eleccionnan liber y husto, pero cu e pais no a cumpli. “Sigur e administracion di Biden ta mirando esaki hopi di cerca,” el a subraya.

Consul General a señala cu e Licencia General 44, cu a wordo emiti pa permiti algun exportacion di petroleo y productonan di combustibel fosil, ta caba dia 18 di october, y mirando e situacion actual, el a indica cu tin posibilidad cu Merca no lo renoba e licencia pa motibo di falta di progreso, a pesar di e bon trabao na Barbados.

“Nos ta spera cu otro paisnan den e region lo sigui encurasha Maduro pa haci e cos corecto pa su pais, pa su hendenan, pa e region. Y esey ta loke nos ta trata di haci, trata di haya e manera pa sigui haci esei,” el a remarca.

Kedando den e tema di migrante, Consul General Bond a enfatisa cu un di nan prioridadnan riba tur dos isla ta pa trata di sostene e migrante indocumenta cu ta biba na e islanan. Pa cu esaki e Consulado Mericano ta financia y ta sostene un serie di organisacionnan y na Aruba, e organisacion cu nan ta sostene ta HIAS.

“Nos ta sostene nan. Nan ta haci hopi trabao cu ta trata di brinda sosten social, trata di sostene nan pa haya un forma di status. Tambe ta traha un pa nan tin un caminda pa empleo y naturalmente tambe nan ta sostene nan si nan tin un peticion di asilo pa haci. Tin hopi necesidad den e comunidad migrante y no tin hopi recurso pa nan. Y esey ta un prioridad cu nos ta sostene na Corsou y na Aruba,” el a resalta.

El a agrega cu nan ta sostene tambe e Fundacion pa Desaroyo Panamericano, cu a habri un oficina na Aruba aña pasa y e fundacion ta trahando riba un proyecto cu ta basa na Corsou, pero ta inclui tur dos isla.