Recientemente Consul General di Merca Margy Bond tabata di bishita na Aruba y durante su bishita Bon Dia Aruba tabatin e oportunidad pa realisa un entrevista cune y toca diferente punto di interes. Un di e temanan cu toca tabata su bishita na Universidad di Aruba como parti di un proyecto di educacion entre Universidad di Aruba y Penn State University.
Tocante e evento aki Consul General Bond a splica cu e tabata un recepcion pa celebra e prome Programa di Intercambio di Ingenieria Sostenibel entre Universidad di Aruba y Universidad di Penn State.
“Nunca nos tabatin uno asina prome,” el a remarca. El a sigui splica cu e manera con e programa a wordo traha ta cu tin un profesor di Penn State y un profesor di Universidad di Aruba cu a bin hunto y a traha e curriculum y e syllabus. Tin un total di 13 studiante cu a inscribi pa participa den e programa aki, shete studiante di Merca y seis studiante for di Aruba y e siman aki ta e parti presencial di e siman.
El a indica cu e studiantenan ya a traha y conoce otro virtualmente pa discuti un proyecto cu ta pa yuda Amsterdam Manor Hotel identifica maneranan pa ta mas sostenibel y mas berde pa futuro. E studiantenan di Penn State a biaha pa Aruba e siman aki y a conoce e studiantenan Arubiano.
Segun el a sigui splica parti di e programa ta inclui cu e studiantenan ta bishita Amsterdam Manor Hotel pa papia cu e gerencia, haya tur e datosnan y informacion, y despues nan lo traha riba e proyecto ey hunto den ekipo. E proyecto lo continua durante henter e semester te na final ora nan tarea final ta pa presenta nan resultadonan.
“Nos ta hopi contento pasobra no solamente e ta un intercambio educativo, cual nos kier traha mas di esakinan, pero tambe e ta un oportunidad pa nos uni mentenan hoben y sector priva tambe, y academia y educacion y gobierno pa pensa riba kico ta e solucionnan pa energia limpi, kico ta e solucionnan pa sostenibilidad, con nos por traha riba e asuntonan ey pa futuro. Asina ta cu nos ta hopi emociona pa e intercambio,” Consul General Bond a resalta.
Otro proyecto cu e Consul General a menciona ta EducationUSA, cual tambe ta parti di nan oferta educativo. EducationUSA ta un programa cu e Consulado Mericano a cuminsa durante pandemia, y cu a lansa back aña pasa.
El a indica cu actualmente, pa e programa aki, nan ta wardando pa e nombramento di un consehero educativo full-time, ademas di e otro conseheronan educativo cu ta presente. EducacionUSA ta un programa unda cu studiantenan di scol secundario of post-secundario, por haci un cita y bishita EducationUSA, papia cu un di e conseheronan, y haya tur e conseho necesario den caso cu nan kier continua nan estudio na Merca.
El a splica cu e tarea di e consehero ta pa yuda identifica si e studiante kier bay pa un programa di dos aña of di cuatro aña, kico e mester pa haci e testnan standardisa manera e SAT, con pa yena e solicitud di scol, si ta posibel pa haci un tour virtual of biaha pa bishita e scol, y despues na final, ora cu e studiante a haci tur e aplicacion, nan ta yuda cu e aspecto di ayudo financiero, tur loke tin di haber cu wordo acepta na un di e universidadnan.
Consul General Bond a enfatisa cu EducationUSA lo yuda e studiantenan cu tur aspecto y lo yuda e mayornan tambe, for di con pa saca un cita pa visa, con pa prepara, te na kico pa haci prome cu bay pa Merca.
“E ta un servicio completo, gratis, di conseho educativo, y nos ta hopi contento cu e programa ey tambe. E ta demostra cuanto nos ta considera cu educacion ta un oportunidad pa Arubianonan, un oportunidad pa intercambionan pa tambe Mericanonan ta expuesto na Aruba, y un oportunidad pa Arubianonan biaha y studia na Merca,” el a remarca.
Consul General Bond a menciona cu aworaki ta bay tin consehero educativo full-time na Aruba, locual ta un señal cu un demanda creciente pa studiantenan di Aruba sigui nan estudio na Merca.
El a indica a pesar cu e no tin e cifranan specifico riba cantidad di studiantenan, nan ta mira hopi interes di hende cu ta desea un alternativa, cu no necesariamente kier studia na Hulanda, posiblemente kier studia na Merca. El a agrega cu tradicionalmente hopi atleta for di Caribe Hulandes ta bay Merca y nan ta wordo recluta, pero tin tambe hopi hoben cu no ta atleta, y nan kier mira e studiantenan aki haya e oportunidad di tambe bay studia na Merca.
El a agrega cu conhuntamente cu esaki tin e trabou cu Ministerio di Educacion y cu Gobierno di Aruba ta haci pa desaroya asociacionnan y acuerdonan riba nivel local cu institutonan Mericano y cierto scolnan specifico.
Segun e Consul General a indica Ministerio di Educacion a cera, te cu aworaki, acuerdo cu nuebe scol na Merca pa studiantenan di Aruba por sigui nan estudio na Merca. E logro grandi aki, el a reconoce cu su persona mes no por tuma credito pa e acuerdonan di inscripcion local cu gobierno cu a desaroya pasobra e no ta un area cu consulado Mericano por promove cierto scolnan so pa inscripcion local, pero sinembargo, el a resalta, ta algo cu nan encurasha.
“Nos semper ta contento pa duna nos propio guia of duna cualkier conseho, pero en general e mester ta un programa cu a wordo desaroya pa Gobierno di Aruba. Y tin un representante na Washington, e Minister Plenipotenciario, Zulema Erasmus, y e ta na e luga aya awor. Y esaki ta un di su prioridadnan pa sigui cu e trabou di alcance cu institutonan Mericano pa haya e asociacionnan pa inscripcionnan local,” el a remarca.
El a agrega cu e Consulado Mericano ta hopi contento cu esaki ta un prioridad y el a indica cu e nuebe acuerdonan cu Aruba tin cu scolnan na Merca, Aruba tin mas asociacion pa inscripcion local cu cualkier otro pais den Caribe Hulandes. “Y nos kier mira esaki ripiti, y nos kier mira mas,” el a subraya.
