Ayera e comunidad Dominicano residencia na Aruba tabata di fiesta patriotico, ya cu ayera a ser conmemora e di 172 aniversario di independisa di Republica Dominicana.
E biaha aki e conmemoracion di nan dia nacional ta coincidi cu e 200 aniversario di e natalicio di un heroe di nan independencia, esta Matias Ramon Mella. E tabata esun cu a cende e mecha di e lucha di independencia dia 27 di februari 1844.
Mensahe
“Mi kier felicita e comunidad Dominicano, ya cu diasabra awor 27 di februari nos ta celebra un aniversario mas di independencia di Republica Dominicana”, Consul Rosario de Rosa a bisa.
E diplomatico aki agrega cu e celebracion aki ta bin compaña cu otro acontecimento historico cu nan no por laga un banda. Ta trata di e 200 aña di e natalicio di Matias Ramon Mella cu a tuma luga diahuebs ultimo. El a destaca e balornan di e heroe di independencia Dominicano aki bisando cu e biaha aki nan ta rindi honor na esun cu ta merece honor.
“E tabatin e responsabilidad di e prome “disparo”, kiermen proclama nos independisa dilanti e Porta di Conde of Porta di Misericordia na Rep. Dominicana”. E ta un sitio historico cu a bira e fundeshi di e nacion Dominicano.
El a splica cu Matias Ramon Mella ta un tata fundado di Republica Dominicana, kende a haci posibel hunto cu otro heroenan manera Juan Pablo Duarte y Francisco del Rosario Sanchez, pa nan por a logra nan independencia.
“Nos ta un pais liber, independiente y soberano”, el a bisa. Consul Dominicano a declara cu e logro aki solamente tabata posibel danki na e curashi di hendenan homber y hendenan muhe cu a lucha pa nan nacion por a bira liber y independiente.
