No solamente pueblo di Israel a perde un gran ser humano, sino henter humanidad cu e fayecimento di ex presidente di Israel y ganado di Premio Nobel di Paz, Sr. Shimon Peres (93). “Shimon Peres ta Israel”, asina Consul honorario di Israel na Aruba, Sra. Martha Lichtenstein a declara na Bon Dia Aruba.
E diplomatico a duna un profiel cortico di e gran estadista Hudiu cu a fayece ayera, dos siman despues cu el a sufri un problema cardio-vascular. El a bisa cu Peres a bira politico y poeta; y semper tabata defensor di paz. E ta spera cu e soño di Shimon Peres pa establece paz den e region di Medio Oriente lo por bira realidad un dia no mucho leu.
Sra. Lichtenstein a bisa cu ainda ta prematuro pa anuncia cualkier acto pa honra e memoria di e estadista Israeli aki. “Nos ta expresa nos condolencia y nos sa cu e perdida ta uno ireemplasabel. Pero nos lo desea cu Peres su vision di paz lo por bira realidad pronto”, el a bisa na e matutino aki.
El a bisa cu eventualmente nan lo organisa un servicio recordatorio dedica na e politico Israeli, pero no mester lubida cu den nan kalender Hebreu, nan tin nan Aña Nobo diadomingo awor. E no sa con e Rabin lo bay organisa ambos acontecimento, ya cu ora cu el a duna su declaracion na Bon Dia Aruba, ainda e diplomatico no a yega di papia cu e Rabin.
