Consul di Haiti na Aruba, Herve Saint Louis no sa nada di e avioneta cu supuestamente a sali for di Haiti y cu a aterisa sin un plan di vuelo riba pista di Aeropuerto Reina Beatrix dialuna ultimo.
E diplomatico y hefe di Consulado di Haiti na Aruba a declara na Bon Dia Aruba cu niun instancia, ya sea gubernamental of hudicial di Aruba, a tuma contacto relaciona cu e incidente di e avioneta aki cu tabatin abordo cuater persona abordo. Entre nan tres ciudadano Haitiano como pasahero y un ciudadano Colombiano como piloto.
Locual e consul sa ta locual el a scucha ta loke tur hende ta papia. Igualmente un persona cu a yama na e Consulado di Haiti a bisa cu abordo di e aparato aereo tabatin ciudadano Haitiano; pero e persona aki no a yama bek pa duna mas informacion.
Procedura diplomatico
E diplomatico a bisa na e matutino aki cu e no por bisa nada riba e asunto aki pasobra niun instancia ni Ministerio di Husticia, tampoco Ministerio Publico, Aeropuerto, Polis, Inmigracion no a tuma contacto cu e Consulado di Haiti y tampoco cu su persona. E ta indica cu pa atende un asunto asina tin un procedura diplomatico cu ta wordo haci pa medio di Departamento di Relacion Exterior.
E consul mes no a tuma contacto cu nos autoridadnan local, ya cu te ainda ningun di nan no a tuma contacto cu su persona pa suministra mas informacion. E diplomatico Haitiano a bisa cu nan ta habri pa brinda cualkier colaboracion na nos autoridadnan local relaciona cu e incidente di e avioneta, pero prome nan mester tuma contacto cu nan sede diplomatico.
E ta dispuesto via e canal diplomatico di papia cu nos autoridad competente pa asina nan por suministra informacion oficial, entre otro cual tabata e itinerario di e avioneta pa asina e por tuma contacto cu su gobierno. El a declara cu e lo por papia cu Ministerio Publico di su pais y otro autoridadnan competente pa averigua di unda e avioneta aki a sali. E no tabata sa cu e piloto tabata un ciudadano Colombiano, manera prensa a yega di informa. “Mi ta disponibel pa cualkier persona di e gobierno cu kier puntra mi si mi por busca mas informacion pa nan.”
Gobierno di Haiti
Di otro banda, nan no sa si e avioneta aki berdaderamente a sali for di Haiti. Tampoco e autoridadnan Haitiano a tuma contacto cu su consul na Aruba, ya cu e ta e persona encarga oficialmente como nan representante na Aruba.
E ta haya cu si e gobierno di su pais lo a duna importancia na e caso di e avioneta aki, e tabata e prome persona cu nan lo a tuma contacto cu ne como consul di su pais. E ta deduci cu si e avioneta no a sali for di Haiti, logicamente esaki no ta un asunto cu lo preocupa su gobierno.
El a splica cu si un avioneta ta sali for di su pais tin un canal regular di comunicacion entre Haiti y Aruba pa duna nos autoridad aeronautico tur informacion relaciona cu e vuelo ey, ya sea nomber di e compania, number di matricula of identificacion, luga di salida y ora di vuelo, etc..
Esaki den caso cu a sali debidamente for di Haiti, p’esey e ta deduci cu e gobierno di su pais no sa nada di e caso di e avioneta aki.
Consul Saint Louis tampoco a informa su gobierno riba e caso di e avioneta, ya cu e mes no sa kico e lo por informa nan, ya cu e no tin informacion oficial di nos autoridadnan local. “Mi no ta papia riba un cos cu mi no sa nada di dje”, e ta bisa na Bon Dia Aruba.
Tampoco e supuesto tres ciudadano Haitiano abordo di e avioneta, y cu eventualmente ta deteni ya cu nan a drenta ilegalmente na Aruba, ainda no a tuma contacto cu e Consulado di Haiti na Aruba.
