Consul di Colombia na Aruba, Mirza Gnecco, no lo sigui mas den su funcion diplomatico. Dia 2 di januari venidero, sra. Gnecco lo cumpli 6 aña como consul di e comunidad mas grandi di migrante riba nos isla. Como funcionario diplomatico den exterior, el a bin pa un periodo defini.

Te ainda no ta conoci e nomber di e consul nobo di Colombia. Sr. Nelson Soto Cardozo, kende ta funcionario di e ministerio di Relacion Exterior di Colombia, y kende recientemente a yega Aruba, lo ta encarga di e consulado. Esaki te ora cu e consul nobo lo asumi su funcion y haya su credencial diplomatico.

Gnecco a declara na Bon Dia Aruba cu unabes cu el a asumi su funcion diplomatico, e tabatin e privilegio di por representa e estado Colombiano den nan sede consular. Pero muy specialmente e echo cu e por representa su pais Colombia dilanti un comunidad numeroso como esun di e Colombianonan na Aruba.

Ya caba e diplomatico aki a ricibi e decreto, caminda for di 5 di februari, Gnecco lo asumi un funcion y responsabilidad nobo den Canciyeria Colombiano. E ta un funcionario di carera diplomatico, y e ta regresa na su ‘cas’ na Bogota, Colombia. El a probecha e oportunidad aki pa expresa su gradicimento na Aruba su pueblo, y muy specialmente na nos autoridadnan. El a bisa cu su principal mensahe di despedida ta di gradicimento.

Segun Gnecco, e ta bandona Aruba cu hopi satisfaccion y feliz. “Yo me voy muy contenta de acá,”el a bisa na Spaño.

Experiencia na Aruba

E ta describi su experiencia di trabou diplomatico na Aruba como uno di ‘siñamento y lesnan di humildad’.Y tambe lesnan di balor y curashi cu el a siña for di e Colombianonan cu ta traha y biba na Aruba.

“Mi a siña hopi di nan. Mi a siña di nan esfuerso grandi cu nan ta haci pa percura di logra un bida miho. No solamente pa nan na Aruba, sino pa nan famia na Colombia,” el a declara. Aruba a bira un experiencia di bida hopi interesante p’e.

Durante su 6 aña di permanencia na Aruba como consul Colombiano, el a señala cu e prioridad di e consulado aki ta e Colombianonan, pa nan sinti nan mes bon atendi y tambe stima. El a bisa cu nan sa cu esaki ‘ta un oficina di porta habri pa nan’. Tambe cu e consulado ta wordo integra pa funcionarionan cu tin boluntad di servicio, y tambe di soluciona nan problemanan, denter di nan capacidad y cumpliendo cu nan responsabilidad. E ta sigura cu e personanan cu generalmente ta bishita e consulado di Colombia ta hendenan bunita y trahado. Si nan por a logra esaki durante e ultimo 6 aña, e satisfaccion aki cerca nan compatriotanan, practicamente nan a cumpli cu tur e metanan di e consulado. Sinembargo, e ta haya cu esaki ta algo cu e mesun comunidad Colombiano ta evalua.

Mas union

E ta haya cu nan funcion diplomatico ta cu nan compatriotanan ta bon atendi y stima. Nan a percura di cumpli cu buena fe cu e funcion, ya cu debi na e intencion aki, gobierno di Colombia a bin cu e consulado na Aruba.

Un obhetivo personal cu e ta considera importante pa e comunidad Colombiano ta consciente di dje, ta e poder cu nan tin. Ademas di e cantidad di Colombiano residencia na Aruba, Gnecco ta kere cu nan ta un forsa laboral importante y necesario pa Aruba. “Mi no tin duda cu nos comunidad Colombiano estableci akinan ta yuda construi Aruba pa medio di nan trabou honesto.” Pero no solamente pa medio di nan trabou honesto di tur dia, pero tambe pa medio di nan conocemento y amabilidad.

E ta haya masha grato cu ora bo ta sali na cualkier parti di Aruba y topa cu un ciudadano Colombiano, cu semper nan ta persona amabel, atento, y semper nan ta di bon humor. Igualmente, nan ta consciente di nan responsabilidad y deber cu nan tin den nan sitio di trabou. “Esaki ta algo bisto y cu ta haci mi hopi feliz,” e di.

E ta kere cu e comunidad Colombiano mester ta consciente di e cualidadnan y capacidad cu nan tin como trahado. Nan mester percura pa uni e forsa aki na Aruba, pa medio di un accion conhunto. E ta haya cu e Colombiano mester ta cada bes mas uni na Aruba, y compronde cu nan tin un serie di obhetivo comun.

Segun e diplomatico, Aruba ta un isla bendiciona pa e Colombianonan. Tur cos ta resulta bon pa nan, pasobra e Colombianonan no solamente sa traha, sino cu nan ta disfruta di nan trabou. Pero e ta kere cu cada dia mester existi mas union y trabou conhunto, pa logra algun di e obhetivonan comun entre e comunidad Colombiano na Aruba.

E ta spera cu den futuro lo por bin mas fundacion sin animo di haci placa so, sino cu nan por traha conhuntamente tras di obhetivo comun di e comunidad Colombiano mes tambe. Pero tambe pa cada dia nan por pone mas halto e bon nomber di Colombia, y tambe di loke e Colombianonan ta nifica como hende.

Palabra di danki

Igualmente,Gnecco a gradici na tur e personal di e consulado cu a compaña su persona den e mision diplomatico aki, entre nan Jacob Cabral y tambe Nelson Soto. El a expresa palabra di danki na tur hende y empresa cu semper a yega di contribui cu nan den cualkier actividad, specialmente pa e muchanan di Aruba en general. Tambe na tur miembro di prensa di Aruba, cu semper a atende nan conferencia di prensa.

Na final di su declaracion, Consul di Colombia, Mirza Gnecco a expresa su mensahe di Bon Pasco y prospero aña 2019 pa nan compatriotanan y henter pueblo di Aruba. “Mi ta spera cu nan por celebra e fiestanan aki cu paz y harmonia familiar. Y cu durante e aña nobo nan lo por realisa tur nan obhetivo y metanan.”