E situacion politico economico y te hasta social cu pais Brasil ta pasando aden cu e bahamento, ya sea permanente of temporal di presidente Dilma Rousseff ta algo transitorio, segun Consul di Brasil na Aruba sr. Carlos André Augusto.
E diplomatico Brasilero a declara na Bon Dia Aruba cu e crisis cu a presenta cu e caida di presidente Rousseff, sigur tin un impacto pa su pais. Encuanto Brasil su relacion cu Aruba ya sea diplomatico y/of politicamente, no tin niun problema directo cu e lo por afecta e relacion bilateral.
Relacion turistico y comercial
Loke si sr. Augusto ta wak ta e caida di efluho di turistanan Brasilero na Aruba. Pero e situacion aki no ta algo nobo ni desconoci, ya cu ta algo cu ta sosodiendo un par di luna caba dor di economia di Brasil. Te hasta minister di Turismo y ATA a yega di haci referencia di dje, ora cu nan ta referi na e mercado di Brasil cu a cay. E turista Brasilero ta uno masha aprecia den nos sector comercial, ya cu e Brasileronan ta un gran consumidor y tin e custumber di gasta ora cu nan ta haci turismo den exterior.
E echo cu e pais Carioca no ta pasando den un bon momento economico, e situacion aki ta crea un ambiente di incertidumbre cerca e pueblo, sector industrial, sector comercial, etc… “Nos no sa ki rumbo esey ta bay tuma. Ki medida economico un gobierno nobo ta bin cun’e…”, segun e Consul Brasilero.
El a splica cu e situacion di incertidumbre aki ta haci cu tur hende ta purba di tene su economia domestico controla, y un cos cu sigur nan ta pone un banda ta nan gastonan relaciona cu vakantie pa asina nan purba di spaar un tiki.
El a bisa cu dor di e situacion economico e fluho di turista Brasilero na Aruba a cay drasticamente casi un 60 pa 70 porciento.Aunke e presencia di turistanan Brasilero a baha, esun cu por ta sigui bin Aruba buscando oferta di hotelnan mas economico.
Apart di turismo ta existi un relacion comercial, ya cu riba nos mercado nos por mira diferente producto manera galiña, articulo produci a base di lechi, carni, etc. cu ta wordo importa fei di Brasil. “E ta un comercio facil pa motibo di e cercania y calidad di e productonan”, el a bisa.
Devaluacion di Real Brasilero
Tambe productonan industrial elabora na Brasil ta penetra nos mercado local. Esaki ta danki cu e balor di dollar ta hopi halto compara cu e Real Brasilero, locual ta facilita e tasa di cambio pa nos importadonan local. Pero tambe ta existi un intercambio cultural y deportivo entre Brasil y Aruba, y actualmente un delegacion local di Taekwondo ta na Brasil entrenando pa e proximo Olimpiada, danki na e bon relacion cu ta existi cu e Comision Olimpico Arubano, segun Consul CarlosAndré Augusto.
Di otro banda e dollar na Brasil a subi demasiado compara cu nan moneda. Dos aña pasa e prijs tabata den carera di 2 Real Brasilero pa un dollar. Awor e devaluacion ta den carera di 3.50 pa 3.60 Real Brasilero pa dollar. E devaluacion di e Real Brasilero ta un diferencia grandi,compara cu un par di añanan pasa y e ta afecta economicamente e poder di adkisiciondi e Brasileronan.
“Esaki ta e punto dicon nan ta purba di evita un poco di biaha no pa Aruba so, pero en general pa exterior”, asina Consul Brasilero a declara na Bon Dia Aruba.
E echo cu nan mester cumpra ticket aereo y estadia di hotel cu nan prijs ta na dollar y no na Real, ta haci dificil pa e Brasileronan por bay afo pa haci turismo. Esun cu ta cumpra oferta di pakete turistico, nan ta haya facilidad pa parti e suma aki te hasta den 10 paga, pero e ta keda mara na dollar. E problema ta cu si e dollar ta subi hopi di un luna pa otro luna, e debe na Real ta bira mas grandi pa e turista Brasilero. P’esey nan ta prefera di haci turismo na Brasil mes cu ta mara na moneda local. “Esaki ta e impacto cu nos ta wak directamente den turismo tanto den areanan di hotel, aeropuerto…”, el a bisa.
Situacion transitorio
Segun Consul Carlos André Augusto di Brasil, e situacion cu actualmente su pais ta pasando aden ta uno transitorio. Pronto nan lo celebra Olimpiada na Brasil na luna di augustus, y unabes cu e evento aki pasa,ya caba e situacion interno lo ta mas delimita y delinea riba ki direccion of rumbo economia ta bay tuma cu e presidente interino Michel Temer.
Sinembargo presidente Dilma Rousseff lo por bin bek, ya cu e tin 180 dia maximo pa Senado di Brasil delibera riba henter susituacion pa wak si e denuncianan contra dje ta wordo concretisa si of no.
Consul di Brasil na Aruba ta enfatisa cu no mester descarta cu tur e situacion aki ta crea un cierto incertidumbre. “Ban bisa cu pa e siguiente 180 dia e ta bay ta un problema cu ta afecta economia di Brasil”, el a bisa.
E diplomatico Brasilero, sr. Carlos AndréAugusto tin 26 aña na Aruba y ta papia un Papiamento perfecto. Aunke el a nace na San Paolo (Brasil) den un forma di broma e ta bisa: “Mi ta mas Arubiano cu Brasilero”.
E ta indica cu e comunidad Brasilero na Aruba ta alrededor di 300 compatriota, y nan ta persona residencia basta tempo den nos isla. Tambe miembronan di e comunidad Brasilero a yega di vocifera cerca dje nan preocupacion pa e situacion interno cu nan pais natal ta pasando aden actualmente.
