Awe e comunidad Colombiano cu ta esun mas grandi di migrante estableci na Aruba, ta conmemora nan fecha patriotico di e 210 aniversario di independencia di nan pais. Na bispo di e celebracion aki, Misa di Dakota na Spaño a tene un Santo Eucaristia dedica na Colombia su pueblo.

Consul Colombiano na Aruba, Sra. Francia Rodriguez a declara cu e dia special aki nan ta tene na cuenta e circunstancia dificil cu henter mundo ta pasando aden debi na e pandemia di Covid-19. Sinembargo nan ta realisa un actividad masha diferente na esunnan cu nan a yega di realisa den pasado, considerando e situacion particular aki.

Como representante diplomatico di e comunidad Colombiano na Aruba, Consul Rodriguez, su mensahe principal den cuadro di 20 di Juli, ta uno di trankilidad y confiansa. El a bisa cu e comunidad Colombiano mester ta trankil y cu confiansa cu e Consulado ta presente na Aruba pa atende nan.

Apesar cu nos ta confronta un situacion dificil pa causa di e Covid, y cu e fecha di independencia di 20 di juli no ta wordo celebra tradicionalmente manera semper, gobierno di Colombia, Canciyeria y Consulado di Colombia ta trahando pa nan trankilidad y bienestar.

“Nan mester sa cu nos no ta suspende nos trabao, ya cu nos ta sigui traha permanentemente. Asina nan por sa cu por conta cu nos den tur momento y cu Canciyeria y gobierno nacional semper ta pensa riba nan compatriotanan bibando den exterior,” esaki tabata consul Rodriguez su mensahe pa e comunidad Colombiano na Aruba.

Campaña

Den cuadro di Dia di Colombia, Canciyeria di Colombia a lansa un campaña bao e nomber “Orgulloso de nuestra bandera.”

Na Aruba, consulado di Colombia a desaroya un actividad pa tur muchanan interesa di traha un bandera di Colombia, y trece nan prome cu merdia den nan sede consular situa na Julianastraat 4, local 2. Esun interesa por haya mas informacion riba nos Facebook page, caminda e consul Rodriguez ta duna mas detaye di nan campaña pa medio di un video.

Na final di e campaña aki, consulado tin un bandera grandi pa e muchanan y nan mayor por pone nan nomber of firma riba dje. Cu esaki nan ta busca e participacion di henter comunidad Colombiano na Aruba den cuadro di nan fecha di 20 di juli, Dia di Independencia di Colombia. E bandera aki lo wordo manda pa Colombia pa asina e lo wordo exhibi riba social media di Canciyeria di nos pais bisiña.

Comunidad Colombiano

E diplomatico a referi tambe riba cierto preocupacion cu e comunidad Colombiano a trece dilanti cerca nan consulado. Un di nan tin di haci cu e situacion di crisis cu e pandemia di Covid a trece cune.

E kier bisa nan cu na prome luga nan por conta cu e servicio di nan consulado pa realisa e tramitenan cu normalmente nan mester realisa. Apesar di e situacion di e pandemia, consulado di Colombia ta sigui duna su servicio y no ta stop nan actividad, el a declara na e matutino aki. Tabatin un periodo cu nan oficina mester keda cera. Pero nan a sigui ofrece servicio via telefon of online pa atende cualkier caso di urgencia.

Actualmente y despues cu no a wordo reporta mas caso na Aruba pa varios siman di Covid, nan a habri nan oficina bek pa brinda atencion presencial. Nan ta atendiendo tur sorto di tramite cu excepcion di esun di otorgamento di cedula. Ta asina cu Canciyeria di Colombia a ordena pa niun consulado ofrece e servicio di cedula, ya cu esaki no ta tene cuenta cu distanciamento social. Pronto lo bin algun sorto di proteccion pa asina ofrece e servicio di cedula.

Otro trabao cu e Consulado di Colombia mester a atende durante e temporada dificil di crisis y ciere di frontera, ta esun di e vuelonan humanitario. El a laga sa cu nan a logra un vuelo humanitario hunto cu e consulado di Colombia na Corsou. E biaha ey nan a logra repatria 180 Colombiano, 90 di Aruba y e mesun cantidad for di Corsou.

Otro asunto tin di haci cu e Colombianonan cu a perde nan trabao of cu nan permiso a caduca. Nan ta situacion dificil pa tur hende cu no ta ricibi entrada. Algun di nan a tuma contacto cu e consulado di Colombia, caminda nan a yega di haya cierto ayudo den diferente aspecto.

Consul Rodriguez a bisa cu algun ciudadano Colombiano a ricibi cierto ayudo cu Canciyeria di su pais a canalisa algo di recurso economico, specialmente pa e turistanan Colombiano cu a keda pega na Aruba, y nan tabata den un situacion dificil. E caso aki a wordo atendi den tur consulado cu pais Colombia tin rond mundo tocante e turistanan Colombiano cu a keda pega den exterior.

Mensahe presidente Colombia

Presidente Colombiano, Ivan Duque a manda un palabra di gradicimento na tur Colombiano cu ta biba den exterior. Aunke nan no ta bibando den nan teritorio, si nan ta presente cu nan cariño, bos di aliento y ayudo pa tanta famia.

Nan ta pone nomber di Colombia na halto y cu semper e color di nan bandera ta den nan curason. El a referi cu mundo ta confronta kisas e pio crisis cu humanidad a yega di conoce for di II Guera Mundial. “Pero den cada sitio cu tin un Colombia tin un speransa, energia, alegria, reciliencia, ingenio y creatividad, ” el a declara den su mensahe.

Tambe el a declara cu ta hopi cos e Colombiano ta sigui contribui pa nan pais. Y tambe den nan actividad diario cu nan ta eherce den nan trabao, nan ta keda orguyosamente Colombiano.

Den e dia di awe e mandatario a manda su bos di aprecio y gratitud, y el a laga sa cu hunto nan por sigui construi pa nan pais por bay dilanti. “Dios bendiciona boso. Feliz 20 di Juli,” asina e mandatario a finalisa su mensahe.